Jogadór Mouzinho de Lima husik Kamboja no klube Ankor Tiger FC
DILI, 26 outubru 2022 (TATOLI) – Jogadór estrela Timor-Leste Mouzinho Barreto de Lima, ne’ebé durante ne’e joga iha klube Kamboja Ankor Tiger FC sei haksumik hela Kamboja hodi fila hikas mai Timor- Leste, nune’ bele hamutuk ho selesaun nasionál senior.
“Ohin loron ikus ba ha’u hela iha Kamboja, tanba liga Kamboja nian sei hahú fali iha agostu tinan-oin , maibé ha’u nia kontratu seidauk hotu dezembru foin ramata, tanba ami nia klube la konsege tama iha top 4, atu bele tuir play off Asian Football Confederation (AFC) nian entaun agora joga laiha ona, ne’e mak ami ida idak deside fila ba nia nasaun”, dehan eis jogadór AD SLB Laulara ne’e ba Agência TATOLI via WhatsApp, kuarta ne’e.
Daudaun ne’e Mouzinho sei hanesan jogadór Ankor Tiger FC nian tanba kontratu seidauk termina no tinan oin jogadór ne’e livre ona kontratu.
“Ha’u agora sei hanesan jogadór Tiger nian, maibé tinan oin ne’e livre ona, depende Ankor hakarak ha’u mantein nafatin, se la uza mós laiha buat ida ne’e depende ba klube, maibé klube dehan ba ha’u sira sei kontaktu fali ha’u iha fulan jullu antes tama ba kompetisaun, ha’u mós ho Agência no familia hamutuk mak deside”, katak jogadór númeru kamizola 77 ne’e.
Nia dehan, daudaun ne’e klube balu tenta hakbesik aan hela ba nia atu husu nia bele reforsa klube seluk, maibé jogadór ne’e seidauk foti desizaun.
Jogadór Timór-oan ne’e, asina kontratu ho klube Angkor Tiger FC iha loron 31 maiu, ho durasaun kontratu to’o dezembru tinan ne’e, tuir durasaun liga Kamboja.
Mouzinho durante reforsa klube Angkor Tiger FC iha pozisaun Playmaker ou joga livre iha kampu klaran ne’ebé tuir duni nia-pozisaun ne’ebé daudaun iha selesaun nasionál hanesan avansadu prinsipál,maibé númeru kamizola 77.
Posizaun Playmaker hanesan jogadór ne’ebé kontrola lala’ok jogu iha ekipa no dala barak envolve iha momentu ofensivu no defensivu hodi hatama golu, liuhosi vizaun, téknika, kontrola bola, kreatividade no abilidade passa.
Antes hosik Kamboja no klube Ankor iha pajina ofisail Ankor nian tau ona Mouzinho nia foto no nia kolega balun dehan “Imi prontu? Oinsa o prontu? Husik fatin ida ne’e ohin loron husik hela Estádiu ida ne’e to’o imi fila fali ou la fila”.
Notísia relevante: Mouzinho de Lima prontu reforsa selesaun nasionál iha jogu AFF Mitsubishi
Jornalista: Hortencio Sanchez
Editór : Florencio Miranda Ximenes
