DILI, 03 novembru 2022 (TATOLI)--Primeiru-Ministru (PM), Taur Matan Ruak, saúda feto Timor-Leste ne’ebé iha loron 03 novembru selebra loron nasionál feto.
“Lori VIII Governu Konstitusionál nia naran no ha’u-nia naran rasik, hakarak fó saudasaun espesiál ba inan-feton sira iha Timor-Leste laran tomak, ba loron espesiál ida ne’e, no votu saúde di’ak no susesu iha família, akadémiku, profisionál no sosiál,” PM Taur hato’o saudasaun ne’e liuhosi nota ne’ebé Agência Tatoli asesu, kinta ne’e.
Notísia relevante: Komemorasaun Loron Nasionál Feto hodi valoriza Maria Tapo nia mate
Xefe Governu dehan, ohin loron hanesan loron espesiál ba inan-feton sira iha Timor-Leste, ne’ebé Governu deside nu’udar loron nasionál ba feto Timor-Leste, koinsidénsia ho loron mate eroína boot, Maria Tapó, nu’udar onra ba feto timor-oan hotu-hotu ne’ebé ho dedikasaun tomak no brani hodi hamriik hamutuk ho asuwa’in mane sira iha luta kontra okupasaun estranjeira durante tinan 24 nia laran, ne’ebé ikus mai sai duni nasaun livre no independente.
“Loron 03 Novembru nu’udar loron reflesaun atu ita reflete kona-ba importánsia papél inan-feton sira iha prosesu dezenvolvimentu nasionál, ne’ebé inan-feton sira dezempeñadu dezde tempu luta,” nia akresenta.
Aleinde, iha dezafiu barak ne’ebé konta mós ho inan-feton sira hanesan ajente transformasaun no mudansa, iha família, eskola, iha servisu-fatin, empreza no komunidade sira. Feto hotu-hotu, liuliu feto sira hanesan dirijente ho reprezentatividade iha lideransa, aleinde kontribui ho kapasidade no koñesimentu sientífiku, étiku no morál sira ne’ebé aumenta beibeik ba igualdade jéneru, sai mós nu’udar protagonista no na’in ba polítika públika kona-ba lejitimidade demokrátika, governasaun di’ak no dezenvolvimentu ne’ebé sustentável liu.
“Ba inan-feton nasionál hotu ne’ebé ohin, selebra loron nasionál feto nian, loron festivu ba empoderamentu femininu. VIII Governu ida-ne’e komprometidu tau ema nu’udar sentru ba dezenvolvimentu, nune’e sei halo esforsu hodi envolve inan-feton sira iha prosesu ba dezenvolvimentu iha ita-nia rain. Na’i Maromak haraik bensaun ba imi ho k’solok liután. Viva feto Timor-Leste! feto forte nasaun forte,” Xefe Governu subliña.
Jornalista : Antónia Gusmão
Editora : Julia Chatarina
