CAAKUB sei sosa hare-kulit hosi Mole-Anan no Halecou
BOBONARO, 04 novembru 2022 (TATOLI) — Sentru Atendimentu Agríkola Kuda Ulun Bobonaro (CAKKUB, sigla portugés), sei sosa hare-kulit hosi agrikultór sira iha área Mole-Anan no Halecou, suku Ritabou, postu administrativu Maliana hodi responde ba konsumidór sira-nia nesesidade iha tinan 2022.
Prezidente CAKKUB, António Barreto da Conceição, informa, iha tinan 2021 no époka dahuluk tinan 2022 ne’e CAKKUB sosa ona hare-kulit hamutuk tonelada 130-resin no kada kilograma $0,40, mai hosi grupu agrikultór 27 membru 302 hamutuk tonelada 130-resin ne’ebé durante ne’e halai natar utiliza irrigasaun Maliana I, hanesan suku Lahomea, Ritabou, Raifun, Holsa no Odomau ho totál área kultiva natar luan ektare 226,226.
Hosi kuantidade hare-kulit 130 ne’e konsege halo ona prosesamentu ho rezultadu foos lokál hamutuk toneladas 60-resin ne’ebé konsege distribui ba Sentru Lojístika Nasionál (CLN, sigla portugés) tonelada 50 no restu kuaze tonelada 18 distribui ba loja sira iha Dili hanesan supermerkadu Gracia no seluk tán, restaurante Pantai Kelapa no komunidade sira iha munisípiu Bobonaro.
Enkuantu presu ba foos rai ne’ebé CAAKUB distribui ba merkadu, kada kilograma ho folin $1,10 sentavu, saka ida 25 kilograma nia ne’e folin $26,50, kilograma 10 ho folin $11,00, foos ikis 25 kilograma $10.
Responsável asosiasaun ne’e haklaken, provizoriu estoke produtu foos lokál iha armazein CAAKUB Soso, Maliana mamuk no falta de’it hare-kulit hanutuk tonelada 18 mak seidauk halo prosesamentu.
“Ha’u hanoin tonelada 18 ne’e ba fulan rua ka tolu sufisiente, tanba tonelada 18 ne’e hare-kulit, entaun dulas hotu hetan de’it foos tonelada 8 ka 9, tanba ne’e ami iha planu karik permintaan konsumidór sei iha, ami sei sosa tán agrikultór sira-nia hare-kulit ne’ebé mak ami identifika ona, hanesan iha Mole-Anan, Halecou ne’e ami identifika atu sosa, sira-ne’e la’ós membru CAAKUB nian, maibé tanba estoke foos iha armazein menus ita sei sosa, bazea ba nesesidade konsumidór sira,” nia informa ba jornalista sira, iha kna’ar fatin Soso, Maliana, sesta ne’e.
Nia enkoraja agrikultór sira-ne’ebé durante ne’e hamahan-aan iha asosiasaun CAAKUB atu kontinua badinas halai natar hodi hasa’e kuantidade produsaun agríkola nune’e bele distribui ba merkadu hodi responde nesesidade konsumidór sira.
CAAKUB mós serbisu hamutuk ho Japan International Cooperation Agency (JICA) kontinua apoia asisténsia tékniku no fó apoia adubus.
“Ami fó gratuita ba sira, depois sira kolleta hare maka selu fila-fali, ida-ne’e mak ami-nia apoia ba sira, hodi motiva nafatin sira hasa’e produsaun tinan ba tinan,” nia katak.
Notísia relevante: CAAKUB sosa hare-kulit tonelada 130 hosi agrikultór Bobonaro
Jornalista : Sérgio da Cruz
Editór : Evaristo Soares Martins
