Eletrisista 11 hosi RAEOA kompleta ona formasaun iha Jakarta
OÉ-CUSSE, 04 novembru 2022 (TATOLI) – Eletrisista na’in-11 ne’ebé durante ne’e hala’o kna’ar iha sentrál power-plant Inur Sakato, Rejiaun Administrativa Espesiál Oé-Cusse Ambeno (RAEOA), kompleta ona formasaun iha sentru formasaun durante semana ida iha empreza internasionál PT.Wartsila iha Jakarta, Indonézia.
Responsável ekipa tékniku no planeamentu iha departamentu EDTL Oé-Cusse, José Alexandre Bana, informa, formasaun ne’e realiza durante semana ida ho matéria prinsipál maka, oinsá prátika kona-bá tékniku operasaun, manutensaun mekánika no manutensaun ba elétrika.
“Ekipa primeiru nian remata ona iha kinta ne’e, formasaun ne’e realiza durante semana ida nia laran, alvu ba tékniku sira mai hosi sentrál elétrika Inur Sakato, ita-nia prezensa iha formasaun ne’e importante tanba atu aumenta ita-nia koñesimentu kona-bá matéria no prátika tékniku nian hanesan operasaun mákina, manutensaun ba mekánika, no manutensaun ba elétrika nian,” José Alexandre Bana, informa ba Agência Tatoli liuhosi watshapp hosi Jakarta, sesta ne’e.
Nia dehan, tuir kalendáriu iha semana oin loron 10 novembru Autoridade RAEOA sei dezloka tán ekipa daruak hamutuk ema na’in-hitu ba Jakarta atu tuir tán formasaun ho matéria hanesan.
“Ita-nia formasaun ne’e nia objetivu primeiru maka atu hasa’e koñesimentu tanba mudansa globalizasaun entaun ita uza oportunidade ne’e atu fasilita formasaun ba funsionáriu tékniku sira, nune’e iha futuru bele mellora servisu di’ak liután iha Oé-Cusse, tanba daudaun ne’e ahi lakan 24 oras tama ona to’o bairru izoladu sira, entaun ita-nia rekursu umanu tenke preparadu hodi asegura no fó asisténsia másimu,” nia afirma.
Formasaun ne’e hahú iha 27 novembru 2022, ne’ebé abertura diretamente hosi Prezidente Autoridade RAEOA, Arsénio Paixão Bano hamutuk ho Diretór Rejionál Operasaun Australia no Ázia Pasífiku nu’udar mós country empreza Internasionál PT.Wartsila, Erwin Vanderkerff.
Notísia relevante: PA RAEOA abertura formasaun ba tékniku elétrika iha Jakarta
Jornalista : Abílio Elo Nini
Editór : Evaristo Soares Martins
