DILI, 07 novembru 2022 (TATOLI)–Diretór Nasionál Dezenvolvimentu Parke Eskolár (DNDPE), Agostinho Soares, relata katak reabilitasaun fíziku Eskola Ensinu Báziku Filiál (EBF) rua iha munisípiu Liquiçá ne’ebé tama iha planu projetu komunitáriu daudaun konklui ona.
“Projetu komunitáriu ne’ebé ninia reabilitasaun fíziku atinje ona 100% foin maka eskola rua de’it iha munisípiu Liquiçá. Ida maka Eskola EBF Lukulai no EBF Baura iha Maubara. Tuir planu Primeiru-Ministru sei partisipa iha serimónia inaugurasaun eskola,” Diretór informa iha ninia knaar fatin, Ministériu Edukasaun Juventude no Desportu (MEJD), Vila Verde, segunda ne’e.
Tuir kalendáriu serimónia inaugura edifísiu eskola rua ne’e sei realiza iha loron 11 novembru 2022 maibé tanba iha hela ámbitu debate Orsamentu Jerál Estadu (OJE) 2023 mak sei adia, nune’e bainhira ramata debate mak sei realiza serimónia hamutuk ho eskola seluk ne’ebé kuaze konklui ona.
“Ita agora iha mós projetu komunitáriu hamutuk 39, ne’ebé progresu fíziku atinje ona 80% resin. Kuandu ita hein debate OJE 2023 ramata maka inaugura, entaun bele halo dala ida de’it ho projetu seluk,” nia akresenta.
Notísia relevante: Progresu projetu komunitáriu Eskola ESJ Calixa atinje 26,8%
Nia konsidera, progresu projetu komunitáriu hosi eskola rua ne’e la’o lais tebes, ne’ebé kada eskola ho kustu projetu $80.000.
Projetu komunitáriu 202 ne’e ninia prosesu hahú hosi inísiu fulan-marsu, maibé hafoin projetu ne’e lo’o, konsege paradu durante fulan-tolu nia laran no projetu ne’e foin kontinua filafali iha setembru. Hosi projetu komunitáriu 202 ne’ebé agora la’o hela iha territóriu nasionál, iha projetu 189 maka hetan ona pagamentu segunda faze.
“Ita agora halo ona pagamentu terseiru faze ba projetu komunitáriu tolu, enkuantu projetu 11 maka iha hela prosesu verifikasaun hosi Ajénsia Nasionál Dezenvolvimentu (ADN), nune’e bainhira ramata ona verifikasaun maka sei rekomenda mai MEJD atu prepara pagamentu ba segundu faze nian,” Diretór tenik.
Hosi projetu komunitáriu 202, iha projetu 13 maka to’o loron 28 outubru, ninia konstrusaun fíziku foin maka atinje 25%. Bainhira projetu ne’e la’o ona mosu dezentendimentu entre grupu komunitáriu ho badaen.
Nune’e mós, projetu ualu maka ninia prosesu levantamentu 25% konsidera atrazu tanba akontese udan.
“Hahú iha fulan-agostu liubá. Agora iha mós projetu 149 ninia progresu fíziku bele dehan atinje ona 59 to’o 60%,” nia dehan.
Jornalista : Tomé Amado
Editora : Julia Chatarina
