iklan

JUSTISA, HEADLINE

PNTL buka tuir autór tuda rahun uma no hakanek feto ida iha Balibar

PNTL buka tuir autór tuda rahun uma no hakanek feto ida iha Balibar

PNTL hahu buka tuir suspeitu sira ne'ebé tuda rahun uma no hakanek feto ida iha Balibar. Imajen/PNTL

DILI 08 novembru 2022 (TATOLI)— Polisia Nasionál Timor-Leste, hahú buka tuir autór ne’ebé envolve iha kazu asaltu ka tuda kanek vitima Agostinha Jose Pereira Neves (tinan 28) no tuda rahun uma iha área Balibar , aldeia Raikuak, Suku Lahane Osidental, Postu Administrativu Vera-Cruz, Munisipiu Dili.

Tuir deklarasaun husi vitima hanesan uma nain, Wilson Jose Pereira Neves, katak asaun ne’ebé konsidera tentativa omisídiu ne’e akontese iha segunda (07/11), tuku 01:30, madrugada, bainhira vitima hamutuk ho familia sei deskansa hela.

“Ami hamutuk ho familia toba hotu hela derepente ema komesa tuda fatuk ba uma leten no hakilar dehan “ne’e sete-sete imi halimar imi mate tan”, refere nota ne’ebé Agência TATOLI asesu iha tersa ne’e.

Rona tiha grupu deskoñesidu ne’e hakilar, vitima sira sente tauk hodi nonook de’it iha uma laran no foti vitima Wilson mak kontaktu polisia hodi husu ajuda, maibé lakleur de’it iha tuku 2:30, matrugada, sira komesa mai besik uma ho falun oin no sira nia faru uza sasan kroat baku mate ahi-oan iha ferik katuas nia rate oin no kontinua uza besi meik baku rahun vidru janela tolu  hodi kona Agostinha nia oin no sira sona diman iha odamatan vidru rahun hotu sorte maun sira polisia mai lalais, se la’e sira tenta oho tan familia uma laran.

Bainhira grupu deskoñesidu ne’e halo asalta sira haree PNTL komesa sai hosi foho lolon mai sira konsege halai sa’e liu ba foho leten.

Hafoin akontesementu ekipa konjunta Servisu Informasaun Polísia Nasionál (SIPN-PNTL), hamutuk ho Servisu Informasaun Militár (SIM-F-FDTL), junta ho J2, Unidade Informasaun FALINTIL, S2, to’o kedas fatin akontesementu hodi hakalma situasaun no transporta kedas vitima ba ambulánsia hodi hala’o tratamentu.

Entertantu Vitima Agostinha Jose Pereira Neves, deklara nia hetan sona iha parte hasan karuk no durante ne’e nia laiha inimigu ho ema se de’it tanba hanoin de’it mak nia servisu.

“Ha’u servisu cleaner iha otél Bidau ema sira ne’e ami ladun koiñese, maibé ha’u haree mane isin badak ida hakilar sona tama besi meik mai ha’u nia oin ne’e nia lian ha’u deskonfia, ami nia vizinhu, maibé ha’u lakoi duun ema”, dehan Agostinha.

Tanba ne’e, Agostinha kondena hahalok krime ne’ebé akontese no husu PNTL buka tuir suspeitu hirak ne’ebé envolve iha kazu refere, nune’e sira labele moris iha trauma nia-laran.

Parte SIPN mós kontatu kedas ba Eskuadra PNTL Nain-Feto hodi rekolla informasaun no buka tuir autór sira ne’ebe envolve iha asaun brutál ne’e.

Ho situasaun ne’e, PNTL envolve BOP, COE no Eskuadra Nain-Feto hodi asegura vitima nia uma hodi garante hakmatek no halakon trauma ba ki’ik oan sira.

Jornalista : Natalino Costa

Editór       : Florencio Miranda Ximenes

iklan
iklan

Leave a Reply

iklan
error: Content is protected !!