iklan

JUSTISA, HEADLINE

TDD liberta arguidu sona mate Aires Celestino Adelaide tanba minoridade 

TDD liberta arguidu sona mate Aires Celestino Adelaide tanba minoridade 

Logotipu TDD. Imajen Tatoli/Dok.

DILI, 09 novembru 2022 (TATOLI)- Tribunál Distritál Dili (TDD) liuhosi juis titulár Ivan Suritai, kuarta (9/11) ne’e, hatun despaisu hodi liberta totál arguido JPP ne’ebé sona mate Aires Celestino Adelaide iha área Lurumata, suku Fatuhada, postu administrativu Dom Aleixo, munisípiu Dili, foin lalais ne’e.

Iha audénsia Interrogatóriu dahuluk, Ministériu Públiku (MP), ne’ebé reprezenta hosi Prokuradór Domingos Barreto promove arguidu na’in-rua ho inisiál JPP no EFP ho krime omísidiu simples ne’ebé previstu iha artigu 138 hosi Kódigu Penál Timor-Leste.

Notísia relevante:  PNTL detein suspeitu sona mate Aires Celestino Adelaide iha Lurumata

Hafoin, Tribunál halo tiha identifikasaun ba arguidu nain-rua ne’e nia identidade, deskobre katak arguidu JPP mak minoridade, tanba ne’e tribunál labele kontinua rona nia  deklasaun kona-bá faktu sira ne’ebé envolve hosi arguidu.

Tuir Kódigu Penál Timor-Leste iha artigu 20 kona-bá imputabilidade, hosi artigu ne’e pronúnsia katak, arguidu ne’ebé  ho minoridade pur razaun nia idade seidauk to’o atu nia responsabliza ba  krime ne’ebé nia halo.

Tanba ne’e, Tribunál liuhosi juis titulár Ivan Suritai ne’ebé mak preside audénsia interrogatóriu dahuluk ne’e hatun despaisu hodi liberta totál arguidu JPP.

Enkuantu,  arguidu EFP mak tribunál aplika medida koasaun Termu Identidade Rezidénsia (TIR), tanba  arguidu rasik la envolve direta ka ajuda arguidu JPP hodi sona mate Aires Celestino.

Entretantu, Parte Defeza arguidu nain-rua, Defensór Públiku, Henrique Mariz, dehan nia aseita desizaun tribunál nian.

“Ha’u hanoin ne’e tuir lei mak determina katak ema ne’ebé maka labele simu responsabilidade kriminál”, katak nia.

Hatan kona-ba bainhira arguidu JPP nia idade atinje to’o tinan 17 nia bele kumpre hikas responsablidade kriminal ne’ebé nia komete, Defensór Públiku ne’e dehan depende fali ba Ministériu Públiku.

“Maibé agora daudaun arguidu seidauk bele asume responsablidade kriminál tanba nia sei minoridade”.

Audénsia ne’e preside hosi Juiz Titulár Ivan Suritai, MP reprezenta hosi Prokuradór Domingos Barreto no arguidu sira hetan asisténsia legal hosi Defensór Públiku Henrique Mariz.

Jonarnalista: Natalino Costa

Editór            : Florencio Miranda Ximenes

iklan
iklan

Leave a Reply

iklan
error: Content is protected !!