iklan

JUSTISA, HEADLINE

Kazu partisipasaun ekonómika-negósiu,Constancio Pinto rekoñese aprova proposta hosi empreza Star Product

Kazu partisipasaun ekonómika-negósiu,Constancio Pinto rekoñese aprova proposta hosi empreza Star Product

Eis Ministru Komérsiu Indústria no Ambiente (MCI-Sigla Portugés), Constancio Pinto, sai hosi Tribunal Distrital Dili (TDD), kuarta (12/10). Imajen Tatoli/Francisco Sony

DILI, 10 novembru 2022 (TATOLI)— Tribunál Distritál Dili (TDD), kinta (10/11) ne’e, halo julgamentu kontinuasaun ba arguidu eis Ministru Komérsiu Indústria no Ambiente (MCIA, sigla portugés), Constancio Pinto, ba kazu partisipasaun ekonómika no negósiu.

Arguidu Constancio Pinto inklui arguidu nain rua seluk hanesan eis Diretór Jerál Industria Koorporativu António da Costa no José no arguidu Deolindo Ximenes,nu’udar na’in ba empreza Star Product ho ministériu públiku akuza arguidu sira ho krime partisipasaun ekonómika no negosiu ne’ebé previstu iha artigu 274 no 299 hosi kódigu penál Timor-Leste.

Notísia relevante:  Constancio Pinto sai arguidu ba kazu partisipasaun ekonómika

Tuir akuzasaun, iha loron 19 janeiru 2016 no loron 9 agustu 2016 arguidu José Deolindo nu’udar Diretór kompañia Star Product Unip.Lda, hato’o pedidu no apoiu orsamentu ho montante $400.000, ba prosesu resiklajen ne’ebé tuir planu sei lokaliza iha aldeia Lisibutak, suku Manleuna, postu administrativu Dom Aleixo, munisípiu Dili.

Perante audénsia julgamentu, arguidu Constancio Pinto, rekoñese iha 2016, asume kargu hanesan Ministru Komérsiu, Indústria no Ambiente (MCIA) hodi troka António Conceição “Kalohan” aprova duni pedidu proposta ida ne’ebé submete hosi empreza hodi husu apoia finansiamentu ba nia-atividade resiklajen.

Razaun aprova proposta ne’e, nia dehan tanba kompañia momentu ne’ebá halo resiklajen ba lixu ka transforma plástiku ba kadeira no meja. Iha momentu ne’e konsege importa ona ba iha rai li’ur hanesan Indonézia no nasaun sira seluk.

Constancio Pinto deklara mós ba tribunál katak bainhira haree atividade empreza ne’e interesante tebes tanba hala’o atividade resiklajen ne’e aliña ho polítika Governu nia iha momentu ne’ebá, hanesan halo redusaun ba lixu, kria ambiente saudavél no kria indústria transformadora.

Haree ba atividade ne’e aliña ho polítika governu, eis-ministru ne’e akresenta fó orientasaun ba Diretór Jerál Manuel Cortereal hodi forma ekipa tuun ba avalia kompañia ne’e nian atividade iha área Fomentu no haree duni empreza hala’o atividade resiklajen ba lixu ho baze ba saida maka hakerek iha proposta no ekipa monitorizasaun mós hetan rai ne’ebé kompañia uza ne’e iha hela disputa.

Nune’e, MTCIA selebra akordu ho kompañia atu apoiu osan hosi kategoria subvensaun públika ho baze dekretu-lei númeru 1/2009, kona-ba apoia ba kompañia lukrutivu no non lukrutivu sira ho baze ba proposta sira ne’ebé konsidera aliña ho programa Governu atubele fó bein estar ba povu.

Osan subvensaun ne’e, MCIA fó ba kompañia ho faseadamente, nune’e iha fase dahuluk MCIA atribui osan ho valór $120.000 atu kompañia halo atividade indústria transformadora iha área resiklajen. Enkuantu Pagamentu daruak MCIA halo bainhira kompañia ne’e submete ona relatóriu serbisu 60%.

Iha tinan 2017, kompañia ne’e submete fali relatóiu ba MCIA, nune’e hanesan Ministru iha momentu ne’ebá haree kompañia nia relatóriu fó duni sinál pozitivu tanba ajuda duni polítika Governu ba redusaun lixu inklui fó empregu barak ba timoroan , ho nune’e kompañia husu MCIA atu halo pagamentu daruak 60%.

Iha momentu ne’ebá, nia dehan halo pedidu ba Ministériu Finansa atu halo pagamentu daruak ba kompañia ne’e tanba halo ona nia atividade.

Maibé liuhosi asesoria juríduka MF halo parserer katak labele halo pagamentu ba kompañia  ne’e tanba ho razaun osan subvensaun públika ne’e,  tuir lei atribui de’it ba  benefisiáriu ho negósiu ki’ik no rai ne’ebé kompañia uza halo atividade sei iha hela disputa loron ruma fó prejuizu ba Estadu.

Nia hatutan hanesan membru Governu iha momentu ne’ebá rejeita hetan parserer ne’e no nia kontinua husu ba MF atu halo pagamentu ba kompañia ne’e.

“Maski nune’e, ha’u rejeita akuzasaun balun ne’ebé Ministeriu Públiku aprezenta iha julgamentu ne’e”, deklara Costancio Pinto.

Hafoin rona tiha depoimentu hosi arguidu, tribunál koletivu liuhosi juis Alvaro Maria halo kedan adiamentu ba julgamentu ne’e ba loron 23 novembru 2022, tuku 15:00 hodi rona tan depoimentu hosi arguidu balun ba kazu ne’e.

Audénsia julamentu ne’e, preside hosi juis koletivu Alvaro Maria, José Gonsalves no Arjentino, Ministériu Públiku reprezenta hosi Prokuradór Lidia Soares no arguidu hetan asiténsia legál hosi Defensór Públiku rua inklui Advogadu Privadu ida.

Notísia relevante: Kazu Constancio Pinto, arguidu eis-DJ deklara iha koñesimentu kona-ba proposta

Jornalista: Natalino Costa   

Editór         : Florencio Miranda Ximenes

iklan
iklan

Leave a Reply

iklan
error: Content is protected !!