DILI, 10 novembru 2022 (TATOLI)– Governu liuhosi Sekretáriu Estadu Juventude no Desportu (SEJD) realiza atividade diskursu públiku no pintura hodi komemora aniversáriu Masakre Santa Cruz 12 novembru ba dala-31 no loron Nasionál Juventude.
Atividade ne’e hala’o iha jardin 05 maiu, Colmera Dili ne’ebé partisipa hosi estudante sira iha eskola Dili laran hanesan eskola sekundáriu to’o universitáriu.
“Komemorasaun 12 novembru ne’e, hahú ho atividade oin-oin, ohin ita tama ba iha faze dsikursu públiku no pintura entre joven sira”, dehan SEJD Abrão Saldanha iha nia intervensaun abertura ba atividade ne’e.
Objetivu atu kria atividade ne’e hanesan diskursu públiku hodi buka joven ne’ebé iha kapasidade oratória ka forma ema atu iha sai lideransa ne’ebé ko’alia di’ak.
“Ha’u hein katak espasu ida ne’e atu ajuda di’ak liután foin sa’e sira di’ak liután, ida ne’e kompetisaun, maibé ba ha’u hanesan espasu hodi dezenvolve aan”, nia dehan.
Kona-ba kompetisaun pintura hanesan faze ida ne’ebé forma ema nia isin lolon, tanba tuir ema matenek na’in sira dehan moris laiha arte, ne’e moris laiha kór, ho nune’e pintura ne’e reflesaun ida hosi arte tanba imajinasaun ema ida nian iha futuru ida, refleta iha pintura ida.
“Dala barak ema bele halo diskursu naruk ou dalaruma mós la halo ema komprinde, maibé liu hosi pintura ida bele halo ema komprinde lalais no imajina lalais. Ezemplu hanesan iha tempu rezisténsia ita-nia inan aman sira barak la hatene hakerek no lee, maibé liuhosi imajen ka pintura hanesan lider sira nian hodi manifestasaun”.
Iha fatin hanesan, Prezidente Komisaun Organizadór ba eventu hotu komemorasaun loron importante ne’e, Cezario da Silva, hateten, orsamentu ba atividade ne’e apoia hosi SEJD ho nia montante $20.000, la’ós ba atividade rua ne’e de’it, maibé ba atividade hotu hanesan marsa foinsa’e, dialogu foinsa’e no seluk tan.
“Premiu ba manán na’in iha atividade rua ohin nian pintura no diskursu públiku ho montante $200, segundu lugar $150, terseiru lugar $100”, dehan Cezario.
Jornalista: Hortencio Sanchez
Editór : Florencio Miranda Ximenes
