iklan

DESPORTU, DILI, HEADLINE

FFTL aseita proposta AFTL realiza liga futsal époka 2022

FFTL aseita proposta AFTL realiza liga futsal époka 2022

Jogador Ramelau FC selebra primeiru lugar Futsal Praliga 2020/2021 iha kampu Futsal Fatuhada, sesta 26/11/2021. Imajen Tatoli/Antonio Goncalves

DILI, 11 novembru 2022 (TATOLI) – Federasaun Futeból Timor – Leste (FFTL)  fó ona “lampu verde” ba Assosiasaun Futsal Timor – Leste (AFTL) hodi realiza liga Futsal époka 2022.

Sekretáriu Jerál AFTL Fernando Baptista informa, FFTL aseita ona proposta ne’ebé sira submete atu realiza liga tinan ida ne’e.

“FFTL aseita ona ami nia proposta, proposta ho osan montante hira-hira ne’e iha technical meeting mak fó sai, agora seidauk bele fó sai, maibé posibilidade liga sei hala’o duni tinan ne’e,” dehan Sekretáriu Jerál AFTL, Fernando Baptista ba Agência TATOLI iha Dili, sesta ne’e.

Nia dehan hahú semanan kotuk AFTL loke ona janela transferénsia ba klube atu hala’a transferénsia ba jogadór no sei taka iha 14 novembru.

Antes ne’e, AFTL mós submete ona proposta ho orsamentu $100.000 atu fasilita realizasaun liga ne’e, maibé depende ba kapasidade FFTL nian atu aprova hira. Tanba montante orsamentu ne’e mak sai kalkúlu hosi AFTL  finánsia ba atividade liga nian durante tinan tomak.

Osan ne’ebé propoin atu finansia ba atividade liga hosi klube primeira no segunda divizaun no super tasa nian mak ho montante $100.000 ne’e.

AFTL bele hala’o liga ona tanba iha tinan kotuk realiza ona pra-liga durante tinan tomak no iha klube hamutuk 24, hosi númeru ne’e, klube 10 mak konsege utrapasa ba primeira divizaun no klube 14 iha segunda divizaun.

Klube hirak ne’ebé iha direitu absoluta partisipa iha Liga Futsál 2022 iha jogu primeira divizaun hanesan, Ramelau FC, Mushila FC, Mauputar FC, Becusse United, Boa Sorte FC, São Francisco FC, Caesardante FC, AD Samoro, Gamer FC no Jerman FC.

Enkuantu, klube sira iha segunda divizaun hanesan, Coelho FC, Bermeta FC, M-VDL, Santa Cruz FC, Maudoko FC, Boavista FC Timor, Kuda Ulun FC, Crazy Horse, FIEL FC, Estrela Baguia FC, Baucau All Star, B’Tal FC, Kablaki FC no Academica FC.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!