DILI, 11 novembru 2022 (TATOLI)—Prosesu konstrusaun fíziku Eskola Ensinu Báziku Filiál (EBF) Bebonuk ba edifísiu andár ida ne’ebé ho sala aula neen, eskritóriu ida inklui hariis fatin hitu atinje 26%.
Koordenadór Eskola EBF Bebonuk, Felisberto de Jesus, hateten, prosesu konstrusaun paradu kuaze fulan-rua resin no foin hahú filafali iha loron 09 novembru 2022.
“Loloos rezultadu progresu fíziku reabilitasaun Eskola EBF Bebonuk bele dehan atinje ona 50% ba leten, maibé pagamentu segunda faze paradu kuaze fulan-rua resin, entaun prosesu reabilitasaun labele la’o. Ita foin maka hahú filafali iha loron 09 novembru liubá tanba foin hetan pagamentu, ne’e duni foin mak atinje 26%,” Koordenadór eskola hato’o asuntu iha ninia knaar fatin, Bebonuk, sesta ne’e.
Notísia relevante: MEJD garante projetu komunitáriu konstrusaun infraestrutura eskola sei inaugura iha dezembru
Ba oin grupu komuniáriu sei aselera projetu komunitáriu tanba hetan ona pagamentu segunda faze ho montante $88.127,23, ho nune’e hahú ona instalasaun, monta plafon no keramik.
“Espera katak laiha fallansu orsamentu hanesan akontese iha fulan-rua liubá, nune’e bele garante molok tinan ne’e ramata bele konklui ona,” nia akresenta.
Tuir Koordenadór, daudaun iha de’it sala aula lima maka ativu hela hodi hala’o prosesu ensinu aprendizajen ba estudante sira.
“Sala aula lima ne’ebé ativu ne’e fahe ba turma tolu atu estudante hamutuk 1.056 bele hetan prosesu ensinu aprendizajen. Daudaun ami-nia sala aula la sufisiente atu akumula estudante 1.056, tanba ne’e ami fahe ba turma tolu ne’ebé kada turma hetan de’it oras rua iha prosesu ensinu aprendizajen atu nune’e estudante hotu bele simu matéria,” nia tenik.
Prosesu ensinu aprendizajen ne’ebé hala’o iha eskola ne’e hetan apoiu hosi profesór 25, kompostu hosi permanente 20, kontratadu tolu hosi Governu no voluntáriu rua.
“Haree ba prosesu reabilitasaun sala aula neen ne’ebé la’o daudaun, sei presiza nafatin sala aula foun ba eskola, tanba ne’e ba futuru bele aumenta tan sala foun hodi nune’e bele tulun estudante sira iha prosesu ensinu aprendizajen,” nia sujere.
Jornalista : Tomé Amado
Editora : Julia Chatarina
