iklan

EKONOMIA, HEADLINE

Sentru dadus avaria, MF halo hela backup

Sentru dadus avaria, MF halo hela backup

Ministru Finansa, Rui Augusto Gomes. Imajen Tatoli/Francisco Sony

DILI, 14 novembru 2022 (TATOLI)–Ministru Finansa, Rui Augusto Gomes, informa, daudaun ne’e sentru dadus avaria, tanba ne’e Ministériu Finansa (MF) halo hela backup iha munisípiu ida.

“Dadaun ne’e, Ministériu Finansa halo hela emite PO (Purchase Order) ba mákina RX no mós desaster recovery data center. Ha’u la hatene di’ak ka lae ha’u prunúnsia iha ne’e (plenária) maibé atu dehan katak ita-nia data center iha Ministériu Finansa ne’ebé serve Timor laran tomak agora hakdasak, bainhira buat ruma akontese laiha pagamentu, laiha transferénsia no laiha atividade ruma,” Ministru Finansa hateten iha ámbitu debate Proposta Lei Orsamentu Jerál Estadu (OJE) 2023, iha faze espesialidade, iha plenária Parlamentu Nasionál (PN), segunda ne’e.

Notísia relevante: MF konklui negosiasaun ho DFAT empresta millaun $73,3 dezenvolve aeroportu Nicolau Lobato

Nia dehan, MF halo hela backup ida iha munisípiu ida, maibé labele temi sai munisípiu nia naran tanba kestaun seguransa.

“Atu ko’alia kona-ba situasaun ne’e grave, ne’e situasaun ne’ebé hanesan savi iha ita-nia nasaun,” nia preokupa.

Daudaun ne’e MF monta hela Balansa ida iha fronteira Batugade no tinan oin (2023) sei monta ida iha fronteira Salele (Covalima).

Iha sorin seluk, Ministru konsidera MF hanesan úniku ministériu iha VIII Governu Konstitusionál ne’ebé ninia orsamentu halo redusaun drástika.

“Ha’u fó de’it ezemplu, iha tinan 2021 orsamentu ba Ministériu Finansa hamutuk millaun $34,1, iha 2022 redús ba millaun $29,8, iha tinan 2023 proposta redús tan ba millaun $26,4.

Foin lalais MF konklui ona ninia estratejia reforma fiskál no finansa públika, ne’ebé hetan aseitasaun hosi doadór sira hanesan Uniaun Europeia, Banku Mundiál no Austrália.

“Sira kontente loos, impresaun ka imajen saida mak ita projeta ba sira kona-ba importánsia ministériu ida-ne’e nian no importánsia traballu no reforma jestaun finansa públika bainhira ita redús nia orsamentu,” Ministru tenik.

Jornalista   : Antónia Gusmão

Editora       : Julia Chatarina

iklan
iklan

Leave a Reply

iklan
error: Content is protected !!