Komunidade husu DMCRN Bobonaro hadi’a sistema atendimentu
BOBONARO, 17 Novembru 2022 (TATOLI) — Komunidade sira iha husu Diresaun Munisipál Konservatóriu Rejistu Notariadu (DMCRN, sigla portugés), munisípiu Bobonaro nian atu hadi’a sistema atendimentu, tanba atendimentu ladún di’ak.
Komunidade hirak-ne’e komposta hosi joven, estudante, idozu, inan ho labarik no ema ho defisiénsia, sena malu atu trata dukumentu; sertidaun nasimentu, billete identidade no pasaporte.
Idoza hosi suku Ilat-laun, Francisca Martins, informa, nia parte trata billete identidade (BI) atu kumpre rekizitu hosi Ministériu Solidariedade Sosiál no Inkluzaun (MSSI) atubele asesu ba subsídiu, maibé hein oras barak ona seidauk bele hatama dukumentu, tanba ema barak sena malu metin iha odamatan oin.
Notísia relevante: DMCSRN Bobonaro menus rekursu umanu no transporte operasionál
“Ha’u mai hosi Marobo, ohin dadeer mak ami mai atu hasai BI, agora seidauk, tanba ema barak loos, ami ferik ne’e dudu malu ho ema joven sira labele ida, kolen loos ona, ne’e mak mai tuur iha mahon ne’e, hein ema la dudu malu mak tama ba fali,” nia informa ba jornalista sira, iha edifísiu DMCSRN Bobonaro, kuarta ne’e.
Relasiona ho problema ne’e inan ferik ne’e sente triste tanba mai hosi distánsia dook.
“Ami mai sa’e anguna, agora udan tán ne’e karreta fila sedu, ohin loron la foti, aban mós ami sei hein, kuandu ami hamlaha buka família nia uma ba haan, depois foti tiha surat ne’e mak ami fila ba Marobo dala-ida,” idoza ne’e hateten.
Komunidade suku Opa, postu administrativu Lolotoe, Armindo Afonso, haktuir, foin lalais ekipa DMCSRN Bobonaro konsege halo atendimentu kartaun BI no dukumentu sira seluk iha Lolotoe kuaze semana rua, maibé prioridade liu ba idozu no inválides sira-ne’ebé atu asesu subsídiu.
“Ami mós la hatene dokumentu mak la kompletu ka oinsá mak ne’e, atu fó surat tahan mutin de’it mós susar loos. Ida-ne’e ami sente triste liu, mai tán ho ojek selu $30, dalan moos aat, to’o iha-ne’e mak sena malu ida hanesan ne’e. Sé ohin la foti, ema hein tán ne’e osan ojek mós aumenta,” nia dehan.
Nune’e mós estudante Marçal Baptista, husu ba Ministériu Justisa atu rezolve mákina Fargo prosesamentu BI ne’ebé avaria hela durante tinan barak ona.
“Agora ami mai mós hetan mak BI ida provizóriu, surat tahan mutin de’it ne’e. Ida-ne’e ami sente la seguru, tanba ami mai hosi Bobonaro fila ba udan kona nia bele dodok no aat hotu, ne’ebé ami sujere governu presiza hadi’ak sistema sira-ne’e,” nia tenik.
Hatán ba preokupasaun hirak-ne’e, Diretór DMCSRN Bobonaro, Deolindo Goveia dos Santos, rekoñese durante ne’e komunidade sira sena malu duni atubele asesu ba BI, pasaporte no sertidaun RDTL.
“Sira-ne’ebé mai hosi dook, sei la atende liu tanba fallansu dokumentu, la’ós fallansu atendimentu hosi funsionáriu, iha barak mak mai husu BI orijinál, blanko sertidaun nasimentu laiha, tanba kestaun nasionál nian,” Deolino hateten.
Diretór ne’e dehan, funsionáriu sira kontinua halo atendimentu, maibé tanba fasilidade ladún kompletu obrigatóriu tenke atende komunidade ida-ida ho númeru boot kada loron.
Reponsável DMCSRN ne’e haklaken, durante ne’e funsionariu sira konsege halo ona atendimentu iha postu administrativu balun, maibé programa ne’e labele implementa kobre postu hotu, tanba diresaun ne’e hasoru difikuldades kona-bá menus rekursu umanu, transporte no orsamentu operasionál.
Notísia relevante: Mákina prodús BI avaria dezde 2017, DMCSRN Bobonaro husu MJ solusiona
Jornalista : Sérgio da Cruz
Editór : Evaristo Soares Martins
