iklan

DILI, POLÍTIKA

Komisaun C sei halo audiénsia públika proposta-lei Finansa Munisipál

Komisaun C sei halo audiénsia públika proposta-lei Finansa Munisipál

Prezidente Komisaun C, Deputada Maria Angélica Rangel. Imajen TATOLI/Evaristo Soares Martins.

DILI, 18 novembru 2023 (TATOLI)—Komisaun C trata asuntu Finansa Públika iha Parlamentu Nasionál (PN) sei hala’o audiénsia públika ho entidade relevante kona-ba proposta-lei númeru 44/V(4a)-Lei Finansa Munisipál.

Notísia Relevante: Meza PN baixa proposta-lei Finansa Munisipál ba komisaun C

“Lei ne’e baixa tiha ona mai komisaun, agora prepara halo ajendamentu halo audiénsia. Espera katak antes mandatu hotu bele halo oinsá aprovasaun ba lei Finansa Munisípiu nian,” Prezidente Komisaun C, Deputada Maria Angélica Rangel, hateten ba jornalista sira iha PN, sesta ne’e.

Meza PN baixa ba komisaun prazu loron 40 hodi hala’o audiénsia ne’ebé besik ona maibé komisaun sei halo extensaun tuir tanba durante fulan ida komisaun foku de’it ba proposta-lei Orsamentu Jerál Estadu (OJE) 2023.

“Ami sei hato’o karta ba Prezidente Parlamentu Nasionál hodi hala’o tan extensaun loron 40 hodi bele halo diskusaun,” nia hateten.

Deputada Maria Angélica Rangel seida’uk fó sai detallu proposta-lei ne’e iha artigu hira maibé iha artigu lubun tanba seidauk halo analiza.

Nune’e, esforsu no depende ajendamentu iha Parlamentu Nasionál tuir kalendáriu PN bele aprova lei ne’e to’o tinan oin, se la konsege mak iha lejislatura foun mai mak kontinua.

Antes ne’e, iha loron 22 juñu 2022 Governu liuhosi reuniaun Konsellu Ministru (KM) aprova projetu proposta-lei ne’ebé aprezenta hosi Ministru Administrasaun Estatál, Miguel Pereira de Carvalho, ba kriasaun Lei Finansa Munisipál nian.

“Lei ida-ne’e estabelese rejime enkuadramentu orsamentál, finanseiru no kontabilidade públika ba munisípiu sira,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu.

Aprovasaun ne’e hodi konsidera autónomia finanseira munisípiu, ne’ebé estabelese hosi lei númeru 23/2021, loron 11 novembru, Lei Podér Lokál no Desentralizasaun Administrativa, hodi regula orsamentu munisipál sira.

Antes ne’e, iha loron 21 setembru 2021, Parlamentu Nasionál aprova projetu-lei Eleitorál Munisipál, Poder Lokál, no desentralizasaun Administrativa.

Projetu-lei Poder Lokál no Desentralizasaun Administrativa ne’e konstitui ho pesoa koletiva iha territóriu nasionál ba órgaun reprezentativu sira-ne’ebé define organizasaun, kompeténsia, funsionamentu no kompozisaun define iha lei.

Lejizlasaun ne’e atu hakbesik servisu públiku sira hosi Estadu ba kraik ka atribui kompeténsia tomak ba munisípiu sira halo planu, programa no orsamentu rasik.

Projetu-lei Desentralizasaun Administrativa ne’e previstu atu Governu Sentrál halo transferénsia kompeténsia ka fó podér ba munisípiu sira no atribui kompeténsia balun ne’ebé durante ne’e seidauk fó ba Governu munisipál.

Notísia Relevante: Governu aprova kriasaun Lei Finansa Munisipál

Jornalista : Nelson de Sousa

Editora     : Cancio Ximenes

iklan
iklan

Leave a Reply

iklan
error: Content is protected !!