iklan

DESPORTU, DILI, HEADLINE

KOICA finaliza formasaun futeból juveníl

KOICA finaliza formasaun futeból juveníl

Labarik juveníl sira tuir hela formasaun futeból. Imajen espesiál.

DILI, 21 novembru 2022 (TATOLI) – Governu Korea Súl liuhosi Ajénsia Kooperasaun Internasionál Korea nian (KOICA, sigla inglés, durante fulan neen hala’o formasaun futeból ba labarik juveníl hamutuk na’in-800 iha Dili.

Jogadór juveníl hirak-ne’e durante ne’e hala’o formasaun iha Kampu Alor, Comoro no Bidau, munisípiu Dili.

“Labarik sira-ne’e hahú idade hosi 11-16,  durante fulan neen sira treina halo kompetisaun oioin, la’ós ezersísiu futeból de’it maibé iha mós hanorin oinsá bele hatene sira-nia aan no respeita ema seluk,” Jestór KOICA, Min Young Lee, ko’alia iha kampu demokrasia Dili, segunda ne’e.

Atividade tomak finansia hosi Ajénsia Kooperasaun Internasionál Korea nian no Governu Timor–Leste só apoia fatin ba labarik sira.

Treinadór ne’ebé fasilita formasaun ne’e mai hosi Sentru Juveníl Timor – Leste no balun apoia mai hosi Federasaun Futeból Timor – Leste.

Sekretáriu Estadu Juventude no Desportu (SEJD), Abrão Saldanha, hateten, atividade ne’e hetan kooperasaun di’ak entre SEJD no KOICA ho objetivu atu dezenvolve labarik sira liuhosi futeból juveníl.

“Formasaun ne’e tempu narauk, ohin sira mai halo primeiru tournament hodi fó koñesimentu ba kompeténsia ne’ebé sira iha,” nia katak.

Nia dehan, governu apoia fasilidade no fatin, maibé bainhira konstrusaun ba kampu futeból Becora, Bidau, kampu Alor no kampu Comoro finaliza ona entaun formasaun ba

juveníl hanesan ne’e sei hala’o iha kampu hirak-ne’e.

Nia akresenta, projetu ne’ebé KOICA hala’o sei termina iha tinan 2024 nune’e kada tinan sei rekruta labarik ho idade ualu ba leten hodi tama iha atividade ne’e.

“Husu ba inan aman sira hakarak oan atu tuir formasaun ne’e bele lori mai iha KOICA nia fatin halo rejistu bainhira sira loke rejistrasaun. Planu ne’e só bele halo de’it iha Dili no sei la ba munisípiu tanba buat hotu finansia hosi KOICA,” nia relata.

Jornalista   : Hortencio Sanchez

Editór         : Evaristo Soares Martins

iklan
iklan

Leave a Reply

iklan
error: Content is protected !!