DILI, 21 novembru 2022 (TATOLI)— Ministru Justisa, Tiago Amaral Sarmento, hateten hahu iha janeiru 2023, Diresaun Jerál Serbisu Notariadu liu husi rejistu sivil sei halo atendimentu Sertidaun Moris nian ba povu sira to’o iha área rural.
“Ha’u enkontru ona ho Diretór sira iha Ministeriu Justisa no deside hodi fo orientasaun ba Diretor Nasional Servisu Rejistu Sivil katak hahu janeiru tinan oin atendimentu serbisu rejistu sivil ba sertidaun moris nian ba ema bo’ot, labarik, ema ho difisiensia inklui ema vuneravél sira, laos halo iha Dili deit, maibe to’o ba munisipiu sira,” Ministru Justisa Tiago Amaral Sarmento dehan iha nia intervensaun serimonia emisaun sertidaun moris ba labarik sira ne’ebé halao iha edifisiu FOKUPERS Faról, segunda ne’e.
Nia dehan, funsionariu Diresaun Nasionál Rejistu Sivil Ministeriu Justisa sei hela iha munisipiu durante loron sanolu (10) hodi atende bele halo atendementu ba dokumentu sertidaun moris ba sidadaun sira.
“Labarik sira no ba hirak ne’ebé ho kondisaun difisiensia fisiku no ita nian inan ferik sira ne’ebé maka vuneravél duni, ita bo’ot sira la presiza lao dok atu trata dokumentu, funsionariu notariadu maka sei ba to’o iha ita bo’ot sira nia hela fatin,” afirma Governante ne’e.
Nia dehan, dadaun ne’e Ministeriu rasik halo ona kooperasaun ho UNICEF (Fundo das Nações Unidas para a Infância) iha Timor-Leste, liu hosi programa emite sertidaun moris nian ba labarik foin moris to’o tinan lima iha munisipiu sira iha teritoriu nasionál.
“Bainhira UNICEF hakarak apoia Miniteriu hodi halo emisaun sertidaun moris ba labarik sira ne’e, hanesan Ministru kontente no agradese tebes. Agora ami ho UNICEF kada fulan rua sempre halo enkontru rutina para bele fortifika kooperasaun ida ne’e,” tenik Ministru Tiago.
Tanba ne’e tuir Governante ne’e afirma, sei aproveita kooperasaun ida ne’e, hodi halo tratamentu sertidaun moris ba labarik alende ida ne’e bele fó tratamentu ba hirak ne’ebé presiza halo sertidaun moris.
“Ami sei lori ami nia ekipamentu sira to’o munisipiu hodi halo emisaun sertidun moris ba ita nian povu to’o iha área rur’al. Ne’e desizaun ne’ebé ha’u desidi ba Diretór sira no ami sei halo ida ne’e iha tinan oin,” hateten Ministru Tiago Sarmento.
Tanba atendimentu sertidaun moris mós dala ruma sai problema ba iha sidadaun sira. Dala barak públiku kestiona, tanba atendimentu kle’ur ema forma naruk no ema dudu malu.
“Ita bo’ot sira haree ema publika iha media sosial konaba serbisu Diresaun Nasionál rejistu sivil. Iha media sosial ne’e, povu sira ne’ebe trata Bilhete Identidade no Sertidaun Moris iha Dili, sira nian dokumentus tau de’it iha rai, tanba ne’e atu hatan ba kestaun sira ne’e, ami hakarak haruka funsionariu sira ba munisipiu hodi fó atendementu ba povu ne’ebe presija halo dokumentu,” Governante ne’e fundamenta.
Jornalista: Natalino Costa
Editora : Armandina Moniz
