iklan

EDUKASAUN, HEADLINE

Estudante 15.000 resin iha Ainaro seidauk hetan kaderneta eskolár

Estudante 15.000 resin iha Ainaro seidauk hetan kaderneta eskolár

Mapa munisípio Ainaro. Infografia/Octávio Guterres

DILI, 23 novembru 2022 (TATOLI)–Estudante ensinu báziku no ensinu sekundáriu jerál hamutuk 15.212 iha munisípiu Ainaro to’o agora seidauk hetan kaderneta eskolár, maski Ministériu Edukasaun Juventude no Desportu (MEJD) halo ona produsaun kaderneta hamutuk 40.000 iha faze dahuluk.

Diretór Servisu Edukasaun munisípiu Ainaro, Oscar de Araújo, hateten, ho kondisaun ne’e rezultadu  ezame seidauk bele prenxe no eskola sei asegura hela.

“Ha’u presiza ministériu responde lalais ha’u-nia ezijénsia tanba kaderneta foun ba estudante ensinu báziku primeiru no segundu siklu foin prodús ne’e mós ha’u la hetan,” Diretór relata ba Agência Tatoli, via telefónika, kuarta ne’e.

Notísia relevante: MEJD sei introdús kaderneta eskolár foun ba nível ensinu báziku

Estudante 15.212 ne’e kompostu hosi estudante ensinu báziku primeiru no segundu siklu 12.533 no ensinu sekundáriu 2.679, tanba ne’e Diretór ne’e preokupa no husu nafatin ba parte MEJD, liu-liu Gabinete Avaliasaun Dezenvolvimentu Kurrikulár (GADK) atu trata lalais asuntu ne’e.

“Husu ba parte gabinete atu toma responsabilidade atu lalais atende preokupasaun sira ne’ebé hato’o, tanba estudante nia inan aman ezije beibeik bainhira maka sira-nia oan bele hetan kaderneta eskolár,” nia akresenta.

Iha fatin ketak, Koordenadora GADK, Edia Monteiro, konsidera ezijénsia Diretór Servisu Edukasaun Ainaro pertinente tebes, tanba ne’e nia promete sei rezolve kaderneta eskolár ba ensinu báziku iha tinan ne’e.

“Ami seidauk distribui ba de’it primeiru no segundu siklu iha Ainaro, tanba ne’e ami sei rezolve iha tinan ida-ne’e tanba prosesu produsaun sei la’o hela,” nia promete.

Tuir nia, prosesu produsaun ne’e iha ona faze finál, nune’e bainhira konklui ona gabinete sei halo kontaktu ba diresaun munisipál atubele foti.

“Kaderneta eskolár ba Ainaro seidauk bele distribui tanba fallansu tékniku,” nia tenik.

Jornalista   : Tomé Amado  

Editora        : Julia Chatarina

iklan
iklan

Leave a Reply

iklan
error: Content is protected !!