iklan

EKONOMIA, HEADLINE

CCT sei distribui viveiru 400.000 resin ba agrikultór sira tinan oin

CCT sei distribui viveiru 400.000 resin ba agrikultór sira tinan oin

Prezidente Kooperativa Kafé Timor, Mário Soares. Imajen Tatoli/Francisco Sony

DILI, 25 novembru 2022 (TATOLI)–Kooperativa Kafé Timor (CCT, sigla portugés) prepara ona viveiru baunilla, pimenta, cengkeh, kafé arabika inklui ai-mahon hamutuk 400.000 resin hodi distribui ba agrikultór sira iha munisípiu, tinan oin.

“Ita prepara viveiru 400.000 resin atu distribui ba agrukultór hamutuk 26.000 iha tinan oin. Ida-ne’e Rejiaun Administrativa Espesiál Oé-cusse Ambeno (RAEOA) la tama,” Prezidente CCT, Mário Soares informa ba Agência Tatoli, iha ninia knaar fatin, Bidau Lecidere, sesta ne’e.

Notísia relevante: CCT halo reabilitasaun plantasaun kafé ektare 600 tinan ne’e

Viveiru ne’e prodús iha munisípiu Ermera, Liquiçá, no Manufahi.

CCT sei fahe viveiru kakau, baunilla, cengkeh no  pimenta hamutuk 200.000 resin no viveiru kafé 24.000.

“Munisípiu sira ne’ebé iha potensialidade atu prodús kakau no baunilla mak Baucau, Lautém, no Viqueque, CCT rasik halo ona distribuisaun vivieiru iha tinan kotuk hamutuk 135.434 ba agrikultór hamutuk 992,” Mário akresenta.

CCT daudaun ne’e hetan apoiu hosi Governu Nova Zelándia hodi mellora ekonomia no rendimentu agrikultór sira iha Timor-Leste liuhosi deversifikasaun kolleta no expansaun ba plantasaun sira, ne’ebé parseria ne’e rasik hahú iha tinan 2015 to’o 2025.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!