DILI, 25 novembru 2022 (TATOLI) – Konfederasaun Desportiva Timor – Leste (CDTL-sigla Portugés),sesta ne’e, realiza semináriu ho federasaun desportiva hamutuk 35 no atleta hosi modalidade oi-oin hodi hasa’e koinesimentu no abilidade ba treinadór kona-ba saúde no siénsia desportiva.
Objetivu prinsipál hosi semináriu ida ne’e atu oradór sira fahe esperiénsia kona-ba oinsá atu hakle’an ofisiál no treinadór sira iha federasaun nia laran hodi hatene fó treinamentu ba atleta sira.
Biban ne’e, Prezidente CDTL, Macario Sanches, sente kontente tanba federasaun ho atleta inklui treinadór hotu partisipa másimu iha semináriu ne’e atubele lori desportu iha nasaun ne’e ba oin.
“Ha’u kontente tebes tanba partisipasaun federasaun nian másimu loos iha atividade ida ne’e, ita hamutuk atu lori desportu iha nasaun ne’e ba oin, razaun saida ita hamutuk iha ne’e tanba CDTL nia hakarak atu hametin no hakbiit organizasaun desportiva hotu atu iha kapasidade no abilidade hodi jere organizasaun, nune’e bele prodús atleta ho kualidade”, dehan Prezidente ne’e iha salaun Fundasaun Oriente Lecidere Dili.
Atividade semináriu marka prezensa hosi oradór prinsipál Afránio Xavier Amaral ne’ebé esplika kona-ba tékniku no kritéria oinsá treinadór kada modalidade atu fó treinamentu ba atleta sira, nune’e bele iha prestasaun no abilidade ne’ebé di’ak.
Oradór Afránio Amaral dehan treinadór tenke iha konesimentu ne’ebé di’ak kona-ba desportu, liiliu tenke iha fíziku no mental iha kampu hodi fó treinamentu ba atleta sira.
“Treinadór tenke iha pasadu hanesan atleta no treinadór tenke halo planu no monta estratéjia ka tátiku”, nia afirma.
Program ne’e, CDTL realiza tanba hetan kooperasaun másimu ho Sekretariu Estadu Juventude no Desportu (SEJD), tanba antes ne’e treinadór barak sei menús konesimentu treinamentu ba atleta sira, maske iha ona lisansa sertifikadu, nune’e rezulta Timor – Leste sempre derrota iha jogu internasionál no rejionál sira.
Enkuantu atividade ne’e halao durante loron ida no iha futuru sei kontinua tan ho oradór ne’ebé la hanesan hodi fahe liutan konesimentu treinamentu ba atleta sira hodi hadi’a desportu iha Timor – Leste.
Jornalista: Hortencio Sanchez
Editór : Florencio Miranda Ximenes
