DILI, 29 novembru 2022 (TATOLI)– Polisia Nasionál Timor Leste (PNTL), Komandu Munisípiu Dili halo apreensaun ba motorizada Timoroan na’in-34 no karreta ida, nu’udár adeptu ne’ebé lori bandeira nasaun Portugál hodi hala’o karavana iha sidade Dili, hafoin manán nasaun Uruguay ho eskore 2-0, iha Kopa Mundiál 2022, tersa (29/11), madrugada ne’e.
Portatavóz Komandu Jerál PNTL, Superintendente Xefe Arnaldo Araújo konsidera adeptu Timoroan sira-ne’e kontra lei kódigu Estrada. Tanba durante halo apreensaun, PNTL indentifika adeptu hirak-ne’e balun la uza kapasete, motór uza kanu resin ka barrullu, laiha xapa mátrikula, dokumentu inválidu no laiha karta kondisaun.
“Ita-nia polísia halo pasa revista hodi halo apreensaun ba motorizada 34 no karreta ida, tanba adeptu timoroan sira-ne’e halo karavana hale’u sidade Dili hodi kontra kódigu estrada”, hatete Portavós PNTL ne’e ba jornalista-sira iha Komandu Jerál PNTL, Caicoli, tersa ne’e.
Hafoin halo apreensaun, PNTL pasa kedan billete infrasaun atu infratór sira ba selu koima iha banku no motorizada kontinua lori ba asegura iha Komandu PNTL munisípiu Dili ho Komandu Jerál PNTL.
PNTL alerta nafatin ba adeptu futeból sira atu iha ámbitu jogu Kopa Mundiál 2022, labele hala’o karavana no tenke respeita ba ema seluk nia deskansa iha tempu kalan.
“Polísia kontinua atua nafatin ba hirak ne’ebé koko atu kria disturbiu iha sidade, iha tempu kalan, atu ita hotu tenke respeita ema seluk no kontribui ba situasaun kalma iha kapitál Dili”, nia alerta.
Alende ne’e, Portavós PNTL ne’e mós husu ba sidadaun sira atu fó valór no dignifika Bandeira Nasionál Timor-Leste.
Tuir observasaun Agência Tatoli, hafoin ekipa Portugál manán nasaun Uruguay ho eskore 2-0 iha Kopa Mundiál 2022, adeptu timoroan rihun-resin ho transporte hala’o karavana hale’u kapitál Dili hodi espresa sira-nia kontente.
Jorrnalista: Natalino Costa
Editór : Florencio Miranda Ximenes
