PR Horta konsidera prezervativu importante halo prevensau ba HIV/SIDA
DILI, 30 novembru 2022 (TATOLI)–Prezidente Repúblika (PR), José Ramos Horta, hateten, atu hapara númeru HIV/SIDA iha rai-laran mak tenke prevene-an bainhira halo relasaun sexuál livre uza prezervativu.
“Prezervativu hanesan maneira importante atu prevene moras hada’et ida-ne’e, tanba iha Timor-Leste iha kazu HIV/SIDA ne’e barak tanba falta utiliza métodu uza prezervativu ne’e rasik,” PR Horta hateten iha salaun Rudal, Hudi-laran, kuarta ne’e.
Xefe Estadu hato’o deklrasaun ne’e relasiona ho loron mundiál HIV/SIDA ne’ebé monu iha loron 01 dezembru 2022.
Notísia relevante: MS rejista HIV/SIDA hamutuk 250 no óbitu haat iha janeiru to’o setembru
Biban ne’e, nia husu ba joven sira hodi kuidadu no proteje saúde, tanba hanesan nasaun balun iha Áfrika, populasaun 30% kona vírus HIV/SIDA.
“Ha’u husu ba komunidade hotu labele halo diskriminasaun ba ita-nia maluk sira ne’ebé afeta ba HIV/SIDA, tanba moras ida-ne’e hada’et liuhosi relasaun seksuál, la’os COVID-19 ne’ebé da’et liuhosi ko’alia ba malu,” PR Horta fó hanoin.
Ministériu Saúde rejista Timor-Leste iha ema hamutuk 1.776 afetadu moras HIV/SIDA no óbitu 260, hahú tinan 2003 to’o 2022.
Jornalista : Arminda Fonseca
Editora : Julia Chatarina
