MD husu joven feto Bobonaro prepara kompete iha forsa armada
BOBONARO, 02 dezembru 2022 (TATOLI)-Governu liuhosi Ministériu Defeza (MD), fó hanoin ba joven feto sira iha munisípiu Bobonaro atu prepara kompete sai membru forsa armada.
Diretór Nasionál Polítika Defeza, Juvénio Guerra, husu ba joven feto sira iha munisípiu Bobonaro atu prepara saúde no fíziku nune’e bele partisipa iha vida militár, tanba dadus hatudu taxa partisipasaun nível nasionál atinje 40% no munisípiu refere foin 11% mak envolve membru FALINTIL-Forsa Defeza Timor-Leste (F-FDTL).
Notísia relevante: KM aprova planu rekrutamentu ba membru F-FDTL na’in 600
“Ami-nia haree taxa partisipasaun sei menus, tanba liuhosi sensibilizasaun ida-ne’e husu ba joven feto sira atu-bele envolve vida militár,” Jovénio hato’o asuntu ne’e iha atividade sensibilizasaun kona-bá partisipasaun feto iha vida militár, ne’ebé realiza salaun Alfándega munisípiu Bobonaro, sesta ne’e.
Tanba ne’e Ministériu Defeza no Komandu F-FDTL serbisu hamutuk ho Sekretaria Estadu Juventude no Desportu (SEJD) halo sensibilizasaun ne’e kobre munisípiu 13 atu fahe informasaun kona-bá kuadru estrutura, regra no prosedimentu legál sira atu asesu ba rekrutamentu forsa armada nune’e bele hasa’e taxa partisipasaun joven feto envolve vida militár iha futuru.
Tuir nia, lei garante joven hotu iha direitu atu partisipa iha vida militár. “Ita haree katak natureza militár la haree ba feto no mane, tanba lei ne’ebé konsagra iha Konstitusaun Repúblika Demokrátika Timor-Leste, partisipa mós feto no mane iha vida militár,” nia katak.
Sekretáriu Autoridade Munisípiu Bobonaro, João de Fátima do Carmo, agradese ba governu tanba bele iha inisiativa di’ak realiza atividade nune’e ba futuru joven feto bele iha vontade partisipa iha rekrutamentu sira tuir mai.
Autoridade munisípiu ne’e haktuir, envolvimentu feto Bobonaro iha kedas tempu rezisténsia hanesan eroina Maria Tapo ne’ebé aten barani tebes kaer kilat funu hasoru militár Indonézia.
“Ita haree kontinuasaun hosi eroina ne’e iha rekrutamentu primeiru no segundu batallaun até agora envolvimentu ita-nia feto komesa mai daudaun ona, partisipasaun feto Bobonaro la’ós dehan laiha maibé komesa,” nia hateten.
Diretór Ezekutivu Sentru Juventude Munisípiu Bobonaro, Alcino Lopez, observa katak durante ne’e envolvimentu feto iha vida militár ladún másimu, tanba menus informasaun.
“Ha’u hanesan joven agradese tebes ba Ministériu Defeza lori informasaun mai, ami Bobonaro dalaruma iha rekrutamentu F-FDTL ita haree mane mak antrian liu ba trata dokumentu, feto lae. Ho razaun dalaruma tanba iha inan-aman nia pensamentu ne’e dehan feto imi kaer kilat labele, imi funu labele, maibé ha’u hanoin feto la presiza tama to’o funu,” nia afirma.
Atividade ne’e partisipa hosi joven feto, mane no joven voluntáriu Cruz Vermelha Timor-Leste (CVTL), estudante Universidade Nasionál Timor Lorosa’e (UNTL) no Institutu Of Business (IOB).
Notísia relevante: Kadete foun F-FDTL 600 hahú treinu, na’in-rua rejigna-aan
Jornalista: Sérgio da Cruz
Editór: Evaristo Soares Martins
