iklan

EKONOMIA, HEADLINE

Ministru Finansa sei asina akordu kontribuisaun finanseira tolu

Ministru Finansa sei asina akordu kontribuisaun finanseira tolu

Ministru Finansa, Rui Augusto Gomes. Imajen Tatoli/Francisco Sony

DILI, 02 dezembru 2022 (TATOLI)–Governu liuhosi reuniaun Konsellu Ministru (KM) estraordinária, sesta ne’e, delibera ona hodi autoriza Ministru Finansa, Rui Augusto Gomes, hodi selebra akordu kontribuisaun finanseira ho Austrália, Japan International Cooperation Agency (JICA), no Banku Mundiál.

“Akordu ida ba finansiametu ho Austrália no Export Finance Australia kona-ba Projetu ‘Timor-Leste Airport Facilities Project’. Akordu ne’e prevee kontribuisaun finaseira ida hosi Austrália ba Timor-Leste ho valór millaun $28,36 no kontratasaun empréstimu ho valór millaun $45, ho períodu maturaridade tinan-25 hodi finansia projetu dezenvolvimentu Aeroportu Internasionál Prezidente Nicolau Lobato,” Ministru Finansa informa hafoin reuniaun ezekutivu, iha Palásiu Governu.

Notísia relevante: Governu planeia asina kontratu projetu konstrusaun aeroportu Comoro iha dezembru 2022

Enkuantu, akordu kontribuisaun finanseira hosi JICA kona-ba projetu ‘Improvement of Equipment for Disaster Risk Reduction and Recovery’, ne’ebé akordu ne’e prevee kontribuisaun finanseira hosi JICA ba Timor-Leste ho valór millaun $5,7 hodi finansia akizisaun bens no servisu hodi hadi’a ekipamentu redusaun risku dezastre no rekuperasaun.

Akordu seluk ba kontribuisaun finanseira ho Banku Mundiál kona-ba projetu ‘Timor-Leste COVID-19 Response and Health System Preparedness’, ne’ebé akordu ne’e prevee kontribuisaun finanseira hosi Banku Mundiál ba Timor-Leste ho millaun $5 hodi finansia implementasaun programa vasinasaun kontra COVID-19 no hasa’e kapasidade ba sistema saúde ba preparasaun kondisaun emerjénsia sanitária no fornesimentu servisu saúde esensiál sira.

Iha biban hanesan, KM aprova projetu dekretu Governu nian, ne’ebé aprezenta hosi Ministru Koordenadór Asuntu Ekonómiku, Joaquim Amaral, ne’ebé aprova valór ba remunerasaun órgaun titulár, traballadór, inklui prezensa seña hodi selu ba membru Konsellu Konsultivu ba Ajénsia Promosaun Investimentu no e Esportasaun ba Timor-Leste, Institutu Públiku (Tradelnvest, I.P).

“Dekretu Governu ne’e define remunerasaun mensál $5.000 ba Diretór Ezekutivu Tradelnvest Timor-Leste no remunerasaun mensál ilíkida ho valór $2.500 ba Fiskál Uniku Tradelnvest Timor-Leste,” Ministru Rui tenik.

Nune’e, membru Konsellu Konsultivu Tradelnvest iha direitu simu seña prezensa, ba kada sorumutuk hosi órgaun ne’ebé integra ho valór $150, ne’ebé selu de’it ba seña prezensa bainhira dura pelumenus oras haat.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!