DILI, 07 dezembru 2022 (TATOLI)-Portavóz Polísia Sientifika Investigasaun Kriminál (PCIC, sigla portugés), Octavio da Costa Araújo, hateten, iha tempu badak sei finaliza prosesu investigasaun ba kazu matebian José Bernardino.
Matebian José Bernardino mate iha sela detensaun komandu Polísia Nasionál Timor-Leste (PNTL) maizumenus tuku 19:00 oras Timor-Leste iha loron (01/9) ho kondisaun fiu iha kakorok.
“Relasiona ho prosesu ida+ne’ebé maka kolega matebian ne’ebé maka mate iha sela, konforme lei ne’ebé fó kompeténsia ba PCIC, ita elavora tiha auto-notísia ba Ministériu Públiku no MP delega fila-fali mai fali PCIC hodi PCIC kontinua prosesu ida-ne’e no prosesu ba kazu ne’e to’o iha ne’ebé, rona ona sé, halo ona oinsá, ida ne’e segredu ami labele fo hatene. Maibé prosesu la’o sedu ka tarde sei iha desizaun finál” Portavóz PCIC Octavio da Costa Araújo ba jornalista sira iha kna’ar fatin Colmera, kuarta ne’e.
Nia dehan, daudaun ne’e PCIC kontinua halo investigasaun ba kazu ne’e rasik atu kleur ka lae ne’e Ministeriu Públiku maka sei fó tempu ba PCIC hodi konklui nia prosesu investigasaun.
“Ha’u hanoin prazu ba investigasun ne’e depende ba Ministériu Públiku sira maka sei fó tempu ba investigadór PCIC hodi halo prosesu ba kazu ida ne’e,” Octavio da Costa hateten.
Jornalista: Natalino Costa
Editór: Evaristo Soares Martins
