DILI, 07 dezembru 2022 (TATOLI)— Prezidente Organizasaun Kulturál Fraternál Timor Leste hamutuk ho Arkivu Muzeu Rezisténsia Timor- Leste (AMRT) halo atividade kari ai-funan iha tasi ibun Palásiu Governu hodi hanoin hikas Indonézia invade Timor-Leste iha loron 7 dezembru tinan 1975.
“Ohin loron importante tebes ba ita atu hanoin hikas momentu 07 dezembru 1975 Indonézia invade ita no ita-nia maluk barak mate tanba ne’e ohin ami organiza hamutuk ho membru governu balun no família matebian sira mai kari ai-funan iha tasi,” Prezidente Organizasaun Kulturál Fraternál Timor Leste, Filipe dos Santos ba TATOLI bainhira remata kari ai-funan iha tasi ibun Palásiu Governu ohin.
Nia esplika, iha momentu ne’eba diefisil tebes mai timor oan sira tanba Indoézia sira hahú tama ona liuhosi tasi no lalehan.
“Iha 7 de dezembru Indonézia banhira invade ita, hahú iha madrugada forsa mai hosi tasi lalehan, no rai entaun povu hahú mate barak no Dili laran aisuar deit ona,” nia afirma.
Tanba ne’e ohin loron Timor ukun an ona nafatin hanoin ba pasadu ne’ebé mak povu barak sofre ba rai ida nee.
Iha fatin hanesan, família sobrevivente 7 dezembru tinan 1975, Sara de Jesus Soares, informa ohin loron 7 dzembru 2022 kari ai-funan iha tasi ibun Palásiu Governu oin tanba hanoin hikas fila fali Indonézia invade Timor Leste oho ema barak mate.
“Ohin ita mai kari ai-funan iha ne’e atu hanoin hikas ita-nia oan subriñu avo, tiu, no ha’u nia laen ne’ebé mak mate iha momentu ne’eba no ema oho too agora ami siedauk hetan,” Sara de Jesus Soares dehan.
Nia hateten família mate ba rai ida-ne’e too agora seidauk iha ajudu ruma husi Governu ba familia sobrevivente sira.
“Too agora ha’u seidauk hetan buat ruma huosi Governu, ba ha’u-nia la’en nia mate iha 7 de dezembru ne’e tanba too agora mate iha ne’ebé ami la hatene no rate mos laiha maibé se karik Governu ajudu ruma ami simu se la hanoin la buat ida,” nia informa.
Jornalista : Felicidade Ximenes
Editór: Evaristo Soares Martins
