Top

PCIC dezarma ona membru PCIC ida ne’ebé deskonfia lori arma ba festa

Logotipu PCIC

DILI, 07 dezembru 2022 (TATOLI)-Portavóz Polísia Sientífika Investigasaun Kriminál  (PCIC, sigla portugés), Octavio da Costa Araújo, hateten, PCIC dezasma ona membru ho inisiál MO ne’ebé maka deskonfia uza arma pistola hodi ameasa seguransa sira iha festa ida iha Terra Santa.

Kazu ne’e akontese  iha sesta (25/11)  semana kotuk  iha oras 22:00 kalan, bainhira membru PCIC partispa serimónia kazamentu iha Terra Santa.

Maibé iha momentu ne’e membru PCIC ne’e tarde tanba tuir oras normál otel Terra Santa konvidadu hotu hotu tenke tama iha aula laran 9:00 to’o oras 9:30 maibé membru PCIC ba tarde liu tiha oras ne’ebé determinadu ona kuaze 22:00.

Nune’e seguransa sira iha otel fó tama,  nune’e nia tama ba hodi partisipa festa refere, la kleur de’it membru PCIC ne’e sai mai ho kondisaun lanu hodi trata seguransa sira-ne’ebé hein otel ne’e. Ikus mai mosu diskusaun membru PICIC ho seguransa sira iha fatin refere no mosu dezintendimentu.

Membru PCIC ne’e tolok seguransa sira ho liafuan la edukadu no  membru PCIC to’o hasai tiha pistola no karrega kedas pistola  ne’e hodi ameasa ba seguransa sira no seguransa sira trauma.

“Kuandu akontesimentu ne’e iha kalan iha dadeersan ne’e kedas, ita foti kedas arma hosi nia liman, ita esklui kedas nia hosi ekipa  investigasaun nian no ita loke kedas prosesu hodi kontra nia,” Porta vóz  PCIC, Octavio da Costa Araújo ba jornalista sira iha kna’ar fatin, Colmera, Kuarta  ne’e.

Porta vóz PCIC Octavio da Costa esplika, PCIC iha nia regulamentu ba porta arma própriu ba investigadór ida ka superiór ida lori arma.

“Ita nian membru ne’e  lori arma por autorizasaun, maibé la’ós autoriza lori ba festa,  nia lori arma por autorizasaun  ba oras serbisu ne’e, nia bele lori arma tanba membru refere inklina ka kompostu hela iha grupu ida-ne’ebé ke ezekuta hela mandadu detensaun  durante oras  24 nia laran,” nia afirma.

Nia dehan, lori arma sikat iha knotak tuir prosedimentu legál tanba nia serbisu iha 24 oras hodi buka autór ruma ne’ebé ke por mandadu tribunál nian.

“Maibé momentu ne’ebá, nia  lori arma  to’o ba iha festa no nia tenke ser hatan ba prosesu. Tanba arma ne’e tuir prosedimentu uzu ne’e ba serbsu nian, labele uza fali ba iha fora oras serbisu nian,” katak.

Nia fó-sai katak, investigadór ne’e ho inisiál MO.

“Daudaun ne’e nia tama hela serbisu maibé iha serbisu ne’ebé ke ita limite ona nia liga ho asaun ne’ebé membru komete. Ita loke prosesu ba nia, prosesu disiplinár la’o no prosesu investigasaun, nune’e mós  prosesu administrativu ita loke dadaun prosesu ba nia la’o hela,” nia haktuir.

PCIC mós sei notifika vítima sira-ne’ebé maka sente ameasadu iha momentu ne’ebá.

“Nune’e iha prosesu disiplinár ne’ebé maka ita loke ba membru PCIC ne’e, ita bele haree nia grau  ne’ebé nia komete monu ba violasaun saida,”  nia informa.

Jornalista: Natalino Costa

Editór: Evaristo Soares Martins

Publisidade

Leave a Reply

Latest Post

error: Content is protected !!