KUPAUN, 09 dezembru 2022 (TATOLI) – Atleta Taekwondo feto rua ne’ebé reprezenta Rejiaun Administrativa Espesiál Oé-Cusse Ambeno (RAEOA) okupa fatin datoluk iha open turnamen Kepala Kejaksaan Tinggi (KAJATI) kona-bá kyoirugi no poomsae ne’ebé realiza iha Gedung Desportu (GOR), distritu Kupaun, Nusa Tenggara Timur (NTT), Repúblika Indonézia.
Atleta Taekwondo feto rua ne’e mak hanesan, Adelina da Costa iha klase juniór ho todan kilograma 46, konsege manán dala+rua, hodi halakon atleta hosi Taekwondo Kupaun, provínsia Nusa Tenggara Timur (NTT) iha faze dahuluk.
Hafoin hakat tán ba 4 finál falla hakat ba finál tanba lakon ho atleta Taekwondo hosi distritu Kupaun, Keiza Timo, nune’e atleta Adelina da Costa, ofisialmente okupa fatin datoluk iha eventu KAJATI tinan 2022.
Tuir mai atleta Cherice de Fátima Godinho, iha klase kadet ho todan kilograma 47, manán dalarua, primeiru halakon Jesicca Kolo hosi Taekwondo distritu Timur Tengah Utara (TTU) grupu A, manán daruak atleta Maria Novita dos Santos Kehik, hosi dojan Universidade da Pas (UNPAS) Timor-Leste.
Hafoin atu hakat ba 4 finál, falla atu tama final tanba lakon ho atleta Maria M.B Tino, nune’e atleta Cherice de Fatima Godinho, ofisialmente okupa fatin datoluk iha eventu KAJATI tinan 2022.
Jestór Asosiasaun Taekwondo Rejiaun Oé-Cusse, Jacob Efi, rekoñese, atleta na’in-rua ne’e falla atu hakat ba finál, tanba atleta sira foin mak dala uluk partisipa hodi kompete iha eventu ne’e, entaun atleta sira mós dalaruma kestaun mentalidade, tan foin kompete iha nasaun seluk, maibé falla ne’e hanesan referénsia ba Asosiasaun Taekwondo Oé-Cusse, atubele hadi’a iha futuru.
Tuir nia katak, objetivu Taekwondo RAEOA partisipa hodi kompete iha eventu internasionál ne’e, hanesan oportunidade ida, atu promove atleta sira-nia talentu nu’udar preparasaun fini ba futuru, karik iha prestasaun di’ak, sira-bele envolve iha selesaun nasionál, hodi repreza Timor-Leste partisipa iha eventu internasionál sira.
Antes ne’e RAEOA prepara atleta na’in-20, komposta hosi mane sia (9), feto 11 ne’ebé akompaña hosi treinadór hamutuk na’in-haat (4), ne’ebé dezloka hosi Rejiaun Administrativa Espesiál Oé-Cusse Ambeno to’o distritu Kupaun iha domingu 4 dezembru 2022 ne’e.
Notísia relevante: Atleta Taekwondo feto rua hosi RAEOA kompete iha loron dahuluk hasoru NTT
Jornalista: Abílio Elo Nini
Editór: Evaristo Soares Martins
