DILI,12 dezembru 2022 (TATOLI)— Ministériu Saúde (MS), hahú hosi janeiru to’o setembru, rejista inan isin-rua na’in 16.042 mak konsege hetan tratamentu kuidadu saúde iha fasilidade saúde territóriu nasionál.
“Tuir akordu estimativu hosi Ministériu saúde katak inan isin-rua ne’ebé hetan vizita fasilidade saúde hodi hetan tratamentu kuidadu saúde na’in-27.998, maibé husi janeiru to’o setembru tinan ne’e, inan-isin rua ne’ebé vizita fasilidade saúde na’in-11.956 ka atinje 44%. Ba iha nivel nasionál no kompleta vizita dala haat durante isin rua hamutuk 16.042 ka atinje 58%,” Diretór Nasionál Saúde na Familia Vitór Soares Martins, dehan iha salaun OKA-Dili, segunda ne’e.
Nia mós rekoñese katak inan isin-rua balun la bá fasilidade saúde ne’e tanba distánsia dook atu asesu ba fasilidade saúde no kondisaun estrada la di’ak tanba hela iha área rurál.
Maske nune’e, Ministériu saúde la taka matan, maibé kontinua aumenta fasilidade saúde iha área rurál nomós kontinua kontratu profisionál saúde sira atu halo atendimentu ba inan isin-rua sira.
Iha tinan 2022 alvu ba inan sira atu partu na’in-24.945 no hetan asisténsia husi profisionál saúde na’in-14.678, partu iha fasilidade saúde na’in-12.021 no partu iha uma na’in-2.657.
Enkuantu, MS rejista inan isin-rua ne’ebé mate iha fasilidade saúde iha territóriu nasionál na’in 14 no abortu na’in-342.
Jornalista : Felicidade Ximenes
Editór : Florencio Miranda Ximenes