Komandu PNTL hasai sirkulár bandu membru simu subsídiu $200

DILI, 13 dezembru 2022 (TATOLI)— Komandu Jerál Polísia Nasionál Timor-Leste (PNTL), hasai ona sirkulár ho númeru 412/C-PNTL/XI/2022 hodi bandu membru hotu simu subsídiu fim do ano ho montante $200.
Iha sirkulár ne’e, aliñea 2 sita kona-ba determinasaun ne’ebé hateten membru PNTL sira hotu Komandu jerál la autoriza atu simu osan subsidiu fim do ano $200.
Notísia relevante: Governu hahú atribui subsídiu fim do ano $200 ba komunidade iha Dili
“Karta sirkulár ne’e, ita nian Komandante Jerál la autoriza ba ajente no ofisiál superiór hodi simu subsÍdiu fim do ano ho montante $200”, Komandante Tránzitu Polisia Nasionál Timor-Leste (PNTL) Munisípiu Dili, Inspetór Polisia Domingos Gama hateten ba jornalista sira iha Komandu PNTL Munisipiu Dili, Caicoli tersa ne’e.
Iha sirkulár ne’e mós sita katak kuandu membru PNTL la kumpre karta hosi komandu PNTL mak sei hetan sansaun kriminál, administrativa no disipliña inklui hetan transferénsia fatin serbisu.
“Ha’u fó ona orden no aviza ona ba membru sira hosi grupu WhatsApp katak komandu la autoriza membru atu simu subsídiu $200, maibé karik membru sira simu ne’e responsablidade idak-idak nian”, katak.
Alende ne’e, Komandante ne’e mós fó orientasaun ona ba pessoál administrasaun Tránzitu Dili nian atu hahú rejista membru ida ne’ebé maka simu ona subsídiu fim do ano ne’e.
“Atu relatóritu sira bele fó ba Komandu PNTL Munisípiu Dili, nune’e haruka ba Komandante Jerál PNTL atubele fó sansaun ba membru sira ne’e”, nia afirma.
Maske, nia dehan Komandu Jerál hasai ona sirkulár ne’e, maibé membru balun hahú simu ona subsídiu refere, nune’e membru hirak ne’e sei hetan sansaun.
“Iha duni membru tránzitu balun maka simu ona subsídiu fim do ano $200, maibé ita seidauk identifika didi’ak tanba ohin maka ita foin hahú halo rejistu ba ida ne’e karik rejistu loos hotu bele informa fila-fali”, nia akresenta.
Subsídiu fim do ano ho montante $200 ne’e Governu atribui ba uma-kain ne’ebé ho rendimentu ki’ik no la autoriza atu uma-kain ne’ebé ho rendimentu ka saláriu mensal liu $500.
Objetivu hosi subsídiu ne’e atu fasilita uma-kain ho redimentu ki’ik hodi bele sosa nesesidade báziku balun iha loron boot Natál no Tinan foun.
Notísia relevante:Família rendimentu $500 lasimu subsídiu $200 sei hatama ba kofre Estadu
Jornalista: Natalino Costa
Editór : Florencio Miranda Ximenes

