PNTL husu adeptu futeból kumpre lei kódigu estrada
DILI, 13 dezembru 2022 (TATOLI)— Komandante Unidade Tránzitu Polisia Nasionál Timor-Leste (PNTL), Munisípiu Dili, Inspetór Polísia Domingos Gama, hateten adeptu futeból iha kopa mundiál 2022, bele halo karavana iha kapitál Dili, maibé tenke respeita lei kódigu estrada.
Komandante Unidade Tránzitu hato’o kestaun ne’e relasiona jogu entre ekipa selesaun nasionál Argentina no Krosia, ne’ebé joga iha meiu finál kopa mudiál 2022, tuku 4:00 OTL, madrugada.
“Ba adeptu sira hosi nasun rua, liuliu Argentina no Krosia karik atu espresa sira nian sentimentu kontente liuhosi karavana ne’e bele tanba lei la taka dalan, maibe importante maka nafatin iha koridór lei no husu ba atu nafatin kumpre lei kódigu estrada númeru 6/2003”, hateten Komandante Unidade Tránzitu ne’e ba jornalista sira iha Komandu PNTL Munisípiu Dili, Caicoli, tersa ne’e.
Adeptu sira la kumpre, nia dehan sei aplika lei hodi halo apreensaun no infrator selu koima, hafoin bele foti sira nia transporte.
Bainhira infrasaun ho motór kanu-resin iha obrigasaun selu koima $120, ba xápa matríkula la monta selu $60, la uza kapasete selu $30 no espellu laiha selu 45$. Enkuantu transporte sira ne’ebé maka seidauk rejistu ka laiha dokumentu iha obrigasaun selu koima $300 to’o $600.
Entretantu, nia informa halo apreensaun ba motorizada 12, iha loron 10 dezembru bainhira adeptu Portugál halo karavana, maske derrota hasoru ekipa Maroco.
“Ita lori evidénsia sira ne’e mai iha Komandu Dili, tanba konsidera envolve ona iha infrasaun no daudaun evidénsia sira sei iha hela Komandu PNTL Dili tanba nain ba evidénsia sira ne’e laiha kapasidade atu selu koima”, nia afirma.
Jornalista: Natlino Costa
Editór : Florencio Miranda Ximenes
