Top

SEJD kontinua hametin kooperasaun ho Cuba-Portugál iha área juventude no desporto

Sekretáriu Estadu Juventude no Desportu, Abrão Saldanha. Imajen Tatoli/Francisco Sony

DILI, 13 dezembru 2022 (TATOLI)– Sekretáriu Estadu Juventude no Desportu (SEJD), durante semana ida, hala’o vizita traballu ba iha nasaun rua hanesan Cuba no Portugál hodi hametin liután kooperasaun iha área juventude no desportu.

“Durante vizita ba Cuba no Portugál atu hametin kooperasaun ne’ebé antes ne’e iha ona, ba Cuba ita iha kooperasaun rua ne’ebé konkretamente halo ho Miniséeriu Ensinu Superior no Universidade Edukasaun Fizika no Desportu, Cuba ne’ebé mak durante ne’e lori hela sira nia professor sira mai apoiu hela ita iha Timor – Leste no dezembru nia laran ita atu haruka tan ita nia estudante balun ba eskola iha ne’ebá ba hasai mastradu iha sira nia universidade”, dehan Abrão iha Dili, tersa ne’e.

Alende ne’e,  SEJD halo mós kopperasaun ho institutu desportu Cuba nian atu nune’e bele lori atleta timoroan sira ba hala’o treinamentu iha ne’ebá.  Akordu hotu ne’ebé Timor – Leste halo ho Cuba hatudu sinal pozitivu no hein de’it nia implementasaun iha tinan oin.

“Buat hotu la’o di’ak agora ita prepara de’it planu orsamentu atu ita bele hahú ona atividade sira”, nia afirma.

Iha Portugál, SEJD dehan selebra akordu ida ho Universidade Porto iha fakuldade desportu tanba akordu entre SEJD ho Universidade Porto invalidu ona iha tinan kotuk.

Antes ne’e SEJD mós haruka ona estudante timoroan na’in ida bá hasai kursu mastradu iha Universidade Portu iha desportu nian no finaliza ona estudu fila hikas ona mai Timor – Leste ho nune’e mak SEJD ho Universidade hamoris ona akordu ne’e iha semana kotuk.

“Komitementu iha ona sira sei ajuda ita nia fakuldade desportu iha Universidade Nasionál Timor Loros’e (UNTL) atu ajuda livru no fasilidade balun atu ajuda di’ak liután ita nia prosesu formasaun iha UNTL”, nia afirma.

Nune’e, SEJD asina mós akordu ida ho Governu Portugés liuhosi Sekretariu Estadu Juventude no Desportu Portugal nian atu servisu hamutuk iha área juventude entre estadu rua atu haruka atleta timoroan sira ba halao treinamentu, haruka ba interkambiu entre juventude sira oinsa Portugal bele ajuda Timor – Leste reforsa jogu Komunidade Ko’alia Lian Portugés (CPLP-sigla Portugés) ne’ebé sei hala’o 2024 iha tékniku no organizasaun.

Akordu ne’ebé SEJD halo ho Governu Portugés hanesan akordu foun ne’ebé sei implementa iha tinan oin no akordu ho Universidade Porto hanesan akordu tuan no renova hikas akordu ne’ebé antes ne’e Governu anteriór halo ona.

Jornalista: Hortencio Sanchez

Editór     : Florencio Miranda Ximenes

Publisidade

Leave a Reply

Latest Post

error: Content is protected !!