MS rejista kazu dengue 100 iha outubru to’o novembru
DILI, 20 dezembru 2022 (TATOLI)— Diretór Nasionál Saúde Publika, iha Ministériu Saúde Frederico Bosco, informa hahú iha fulan-outubru to’o novembru, rejista kazu dengue iha territóriu nasionál na’in-100.
“Iha fulan outubru ita rejsita kazu dengue hamutuk 54 no novembru 46, ne’ebé maioria afeta ba labarik sira ho idade 6 to’o 14”, Diretór Nasionál ne’e hateten ba Agência TATOLI iha kna’ar fatin, Caicoli, tersa ne’e.
Notísia relevante:MS hahú distribui ai-moruk abate ba munisípiu hodi prevene dengue
Kazu dengue foun ne’e maioria kazu kamaan no mai hosi munisípiu Dili, Liquiça, Aileu, Bobonaro no Baucau.
Nia informa hahú inísiu dezembru ne’e seidauk rejista kazu foun ruma, tanba intervensaun ba prevensaun kazu dengue la’o di’ak tebes no konta ho apoia Cruz Vermelha Timor Leste (CVTL) no mós Organizasaun Mundiál Saúde (OMS).
CVTL envolve direta liuhosi asaun promosaun ka hala’o edukasaun sivika ba prevessaun dengue no halo fomigasaun no abate iha área risku.
Enkuantu, OMS apoiu ekipamentu ka reajente kímiku atu halo intervensaun no mós apoiu divulgasaun informasaun iha fasilidade saúde hodi ajuda reforsa sistema vizilánsia ba kombate dengue.
“Ita kontinua nafatin sura ho sira nomós ho entidade sira seluk, Tanba ne’e husu ba média nafatin apoiu Ministériu Saúde atubele halo divulgasaun informasaun ba komunidade sira atu iha konsiénsia ba prevensaun dengue liuhosi halo limpeja”, katak.
Ministériu Saúde rejista kazu dengue mate iha fasilidade saúde hotu iha territóriu nasionál husi janeiru to’o maiu 2022 hamutuk 57.
Notísia relevante:Dengue hamate labarik na’in-55 no pasiente sa’e ba 4.899
Jornalista : Felicidade Ximenes
Editór : Florencio Miranda Ximenes
