MS hahú distribui ai-moruk abate ba munisípiu hodi prevene dengue
DILI, 20 outubru 2022 (TATOLI)— Diretór Nasionál Saúde Publika, Frederico Bosco, hateten Ministériu Saúde hahú distribui ai-moruk abate ba fasilidade saúde iha territóriu nasionál hodi prevene moras dengue iha Timor-Leste.
“Ita distribui ona ai-moruk abate ba fasilidade saúde sira iha munisípiu Dili, hanesan Postu adminsitrativu Dom-Aleixo, Cristo-Rei, Vera-Cruz no Nain feto, inklui ba munisípiu hotu tanba iha fulan outubru ne’e rejista kazu dengue hamutuk 20 iha nivél nasionál,” informa Diretór Nasionál Saúde Públika ne’e ba Agência TATOLI iha kna’ar fatin, Caicoli-Dili, kinta ne’e.
Notísia relevante: Janeiru to’o setembru, Servisu Saúde Munisípiu Aileu rejista kazu dengue 84
MS hala’o ona preparasaun tékniku, ai-moruk fumigasaun, abate no rekursu umanu atu halo prevensaun ba moras dengue tanba tempu udan ne’e kazu dengue sempre sa’e maka’as.
“Ita mós oriente ona ita nia servisu saúde munisípiu sira atubele alerta ba komunidade sira halo prevensaun liuhosi limpeja jerál”, katak.
Ministériu Saúde nafatin apoia liuliu prepara guia no polítika inklui monitoriza profisionál saúde, hodi prepara oinsá suporta sira nia asaun iha munisípiu sira atubele hamosu resposta globál ka adekuadu ba iha prevensaun moras dengue nian.
“Ita halo promosaun liuhosi eduksaun saúde ba komunidade no distribui kímiku abate ba kada uma-kain sira atu hamate susuk ne’ebé rsiku ba moras dengue,” akresenta.
Entretantu, Fasilidade saúde iha kada munisípiu hahú hala’o vizilánsia no alerta ba komunidade atu iha kazu foun bele relata atu fó atendimentu imediatamente liuhosi funigasaun ba área risku sira.
Daudaun ne’e, Servisu Saúde Munisípiu Dili, rejista ona kazu dengue hamutuk 15 iha fulan outubru nia laran.
Kazu ne’e deteta iha postu Dom-Aleixo,Cristo-Rei,Vera-Cruz no Nain-feto, nune’e SSM Dili halo ona intervensaun liuhosi fumigasaun no kontinua koordena ho autoridade lokál atubele halo limpeza jerál.
Notísia relevante: MS-PAM hahú prepara estratéjia hodi kombate moras dengue
Jornalista : Felicidade Ximenes
Editór : Florencio Miranda Ximenes
