DILI,14 outubru 2022 (TATOLI)— Diretór Servisu Saúde Munisípiu Aileu, Manuel de Jesus, informa hahú hosi janeiru to’o setembru munisípiu Aileu, rejista kazu dengue hamutuk 84.
“Ami rejsita hahú iha janeiru mai to’o setembru kazu dengue hamutuk 84, liuliu ba labarik sira, maibé iha fulan outubru seidauk kazu foun, maske udan monu rai ona”, hateten Diretór ne’e ba Agência TATOLI iha Parlamentu Nasionál, sesta ne’e.
Atu prevene moras dengue, Diretór Manuel dehan kada sesta-feira, Autoridade munisípiál Aileu organiza malu hodi halo limpeza jerál iha komunidade sira nia le’et hodi halo prevensaun ba kazu dengue.
“Ita nia fusionáriu sira mak sai modelu ba komunidade, signifika katak ita mantein limpeza jerál iha komunidade sira atu prevene moras dengue ida ne’e iha Aileu”, nia afirma.
Daudaun ne’e, Servisu Saúde Munisípiu Aileu preparadu atu prevene dengue no iha kazu dengue sei tuun halo intervensaun liuhosi meiu fumigasaun ba área risku sira.
“Ita prepara hela banhira iha kazu pozitivu ruma iha komunidade nia leet, ita halo kedas fumigasaun no halo intervesaun kle’an ba kazu ida ne’e.Tanba ita nia estoke abate no malation sufisiente hela hodi halo intervensaun ba kazu dengue iha munsisipiu Aileu”, kompromete.
Jornalista : Felicidade Ximenes
Editór : Florencio Miranda Ximenes
