SEJD atribui prémiu ba atleta manán-na’in SEA Para Games no ASEAN University Games

DILI, 20 dezembru 2022 (TATOLI)— Governu liuhosi Sekretáriu Estadu Juventude no Desportu (SEJD), tersa ne’e, atribui prémiu ba atleta na’in-ualu, ne’ebé sai manán-na’in iha jogu SEA Para Games no ASEAN University Games.
“Ohin, ita atribui prémiu ba atleta sira ne’ebé sai manán-na’in iha jogu SEA Para Games iha Solo Indonézia no University Games iha Táilandia, iha jogu rua ne’e ita nia atleta besik na’in-20, maibé atribui de’it prémiu ba atleta na’in-ualu ne’ebé oferese medalla mai Timor-Leste”, hateten Ministru Edukasaun Juventude no Desportu (MEJD), Armindo Maia bainhira partisipa iha atribuisaun prémiu ne’e iha edifisiu SEJD, Dili, tersa ne’e.
Ministru Armindo lori Governu nia naran hato’o parabéns ba atleta na’in-ualu ne’ebé sai ona manán na’in iha eventu internasionál ne’e.
“Prémiu ida ne’e, Governu fó atu atrai liután atleta hotu nia esforsu, nune’e bele hatudu prestasaun di’ak iha jogu internasionál, hodi hamorin Timor -Leste nia naran”, katak.
Atleta hosi modalidade ne’ebé partisipa iha SEA Para Games iha Indonézia mak hanesan, Atletizmu, Hit besi no Tenis Meza.
Atleta sira ne’ebé sai manán na’in mak hanesan, Atletizmu Teofilo Freitas konsege hetan medalla osan mean rua ho prémiu $10.000-resin, Domingos Pereira hetan medalla osan metan hodi simu osan $2,500, Domingas da Costa hetan medalla osan metan, nune’e simu osan $2,500.
Iha modalidade Tenis Meza mak, atleta Abelita Borges sai hanesan segundu lugar, nune’e nia hetan osan $2,500, Pascoela dos Santos sai primeiru lugar hetan osan $4,000 no Bernardo de Carvalho kuartu lugar hetan osan $750. Iha modalidade Hiit Besi nian Antonio José Aniceto hetan medalla osan mutin ho osan $ 3,000.
Enkuantu iha jogu ASEAN University Games ne’ebé partisipa hosi atleta hosi modalidade atletizmu hanesan atleta Felisberto de Deus hetan oferese medalla osan metan ida no mutin ida, nune’e hetan prémiu $1,750, hosi Taekwondo mak atleta Ana da Costa ne’ebé hetan medalla osan metan ida no hetan $750 no Voleiból Praia mane na’in rua simu osan hamutuk $468.
Iha biban ne’e, atleta Abelita Borges hosi modalidade Tenis Meza, hateten nia-parte lamenta ho prémiu osan ne’ebé sira simu tanba nia montante ki’ik tebes.
“Prémiu ne’e ami simu, maibé nia montante mak ki’ik uitoan, ne’ebé ami sente la satisfas. Maibé laiha buat ida Governu fó ona ami agradese simu”, nia afirma.
Jornalista: Hortencio Sanchez
Editór : Florencio Miranda Ximenes

