DILI, 21 dezembru 2022 (TATOLI)–Estudante Colégio Santo Inácio de Loiola (CSIL) Kasait, Helfia Dameriana Vieira Aniceto, ne’ebé kompete iha olimpíada internasionál junior ba siénsia ho idade 19, iha kapitál Bogota, Kolómbia, konsege lori fila medalla bronze ida hodi oferese ba Timor-Leste.
“Ha’u kontente tanba hamutuk ho kolega na’in-lima bele reprezenta kolega estudante hotu iha territóriu nasionál hodi lori naran nasaun Timor-Leste ba tuir kompetisaun olimpíada internasionál ba siénsia iha Kolómbia. Ami la oferese buat barak maibé ami konsege lori rezultadu hodi oferese medalla bronze ida ba Timor-Leste, liu-liu ba Ministériu Edukasaun Juventude no Desportu (MEJD),” Helfia Aniceto, hateten iha Aeroportu Internasionál Prezidente Nicolau Lobato, Comoro, kuarta ne’e.
Nia agradese tebes ba profesór sira ne’ebé fó ona matenek durante preparasaun nia laran inklui MEJD ne’ebé bele fasilita sira hamutuk ho inan aman hotu ne’ebé fó ona apoiu másimu.
“Ami-nia preparasaun ladún másimu, maibé ho grasa Na’i Maromak nian liuhosi ami-nia esforsu maka’as konsege hetan duni oportunidade hodi sai manan-na’in iha olimpíada ne’e, maski ho de’it medalla bronze,” nia akresenta.
Notísia relevante: Estudante neen sei tuir kompetisaun siénsia naturál iha Kolómbia
Helfia haktuir, bainhira rona rezultadu, nia hakfodak kuandu rona ninia naran tama iha kategoria estudante mellór klasifikadu hodi sai manán-na’in iha kompetisaun ne’e, tanba kompetisaun ne’e rasik partisipa hosi estudante 2.003 hosi nasaun 44.
“Hanesan estudante ha’u sei nafatin halo preparasaun di’ak liután atu nune’e ba tinan oin, karik hetan oportunidade hodi partisipa nafatin iha kompetisaun ba siénsia hanesan ne’e maka sei hatudu di’ak liután. Tanba eventu ne’e nu’udar pasu dahuluk hodi manán esperiénsia,” nia tenik.
Nune’e mós, Diretór Jerál Edukasaun Ensinu hosi MEJD, Luís Manuel da Costa Fernandes, agradese tebes ba estudante neen ninia esforsu iha Bogota.
“Ita hotu kontente no agradese, maski ita-nia estudante neen hasoru difikuldade durante viajen maibé sira hotu di’ak hodi bele partisipa iha eventu internasionál ne’e hodi reprezenta nasaun Timor-Leste iha kompetisaun olimpíada ida-ne’e,” nia dehan.
Tuir Diretór, estudante neen ho idade nurak hatudu ona kapasidade hodi hamorin naran Timor iha Bogota, maski sira maka kompete maibé na’in-ida de’it maka hetan medalla bronze maibé sira sai ho ekipa ida forte hodi suporta malu to’o hetan rezultadu di’ak.
“Ha’u orgullu ho sira ninia aprezentasaun, maski Timor nu’udar nasaun kiik ida maibé la lakon ho nasaun lubuk ida ne’ebé hola parte iha olimpíada siénsia ne’e. Sira hatudu ona ida ne’ebé di’ak liu hosi medalla bronze ne’ebé sira lori fila kompara ho nasaun lubuk ida ne’ebé la hetan liu buat ida. Rezultadu ne’ebé sira hetan hanesan pasu ida atu hetan atensaun másimu hosi ministériu iha faze tuir mai hodi bele halo preparasaun di’ak liután, hodi nune’e labele hela de’it medalla bronze maibé bele hetan rezultadu di’ak liután,” nia salienta.
Jornalista : Tomé Amado
Editora : Julia Chatarina
