Top

Abrão Quintas rezigna-an hosi kargu Prezidente Federasaun Boxe Amadora TL

Prezidente Federasaun Boxe Amadora Timor-Leste, Abrão Filipe Dias Quintas. Imajen Tatoli/Francisco Sony

DILI, 27 dezembru 2022 (TATOLI)– Prezidente Federasaun Boxe Amadora Timor-Leste (FBATL), Abrão Filipe Dias Quintas, deside rezigna-an ona hosi kargu no ejize ba estrutura meja asembleia FBATL atu konvoka kongresu extraordináriu iha tempu besik, nune’e bele hili fali estrutura foun.

“Kolega barak hosi klube ezije ha’u dehan atu halo kongresu, maibé atu deside halo kongresu la’ós ha’u nia kna’ar.  Tanba atu halo kongresu ne’e estrutura asembleia mak tuur hamutuk halo karta ida mai ha’u hodi aprova hafoin kongresu bele realiza , maibé sira la halo ida ne’e sira ko’alia bebeik iha rede sosiál. Nune’e ha’u mak deside rezigna-an tiha de’it, duke ha’u ba lakon tempu ho ema sira la komprinde sasan hanesan ne’e”, dehan Prezidente ne’e ba Agência TATOLI iha Benfica-Dili, foin lalais ne’e.

Nia afirma, desizaun rejignasaun ne’e informa ona ba asembleia FABTL iha fulan rua ba kotuk, maibé asembleia mak seidauk deside halo kongresu.

Iha sorin seluk, Prezidente Klube Boxe El-Matador, Abilio Orlando dos Santos, dehan hakarak lakohi iha tempu besik tenke realiza duni kongresu tanba mandatu estrutura atuál kompleta ona iha fulan novembru ne’e.

“Prezidente ko’alia ona atu realiza kongresu entaun loos ona, ami husu ba Prezidente asembleia tenke kria lalais kongresu tanba tinan oin, ita nia boxista sira prepara hela ba jogu SEA Games”, dehan Abilio.

Entretantu, Prezidente klube Orientál Boxe hanesan mós membru asembleia meja, Sebastião da Silva, informa simu ona informasaua kona-ba rezignasaun no hala’o enkontru badak ona ho Prezidente FBATL ne’ebé orienta ona ba sira atu halo lalais karta, nune’e bele realiza kongresu iha tempu besik.

“Ha’u hanesan membru meja asembleia halo esforsu hela no kontaktu ho Prezidente meja, maibé tanba Prezidente ne’e moras hela mak dada to’o agora, maibé Prezidente konkorda ona ami halo karta ida aban ka bairua atu realiza ona kongresu”, nia afirma.

Kona-ba orsamentu atu realiza kongresu sira nia parte sei esforsu atu buka rasik, nune’e bele realiza kongresu, maske Governu la apoiu fundu ruma.

Estrutura atuál ne’ebé lidera hosi Prezidente Abrão hahú asume kargu iha tinan 2018 liuhosi kongresu no iha sira nia mandatu konsege realiza kampionatu nasionál iha agostu fulan kotuk hodi hili atleta ba SEA Games iha Kamboja 2023.

Liuhosi selesaun ne’ebé halo durante ne’e halo lamentasaun ho klube El-Matador no oriental Boxe tanba FBATL foti sira nia atleta laiha konsiderasaun ba klube. Maibé liuhosi enkontru entre El-matador, Oriental Boxe no Prezidente FBATL sei resolve bainhira kongresu ramata.

Jornalista: Hortencio Sanchez

Editór    : Florencio Miranda Ximenes

Publisidade

Leave a Reply

Latest Post

error: Content is protected !!