BAUCAU, 28 dezembru 2022 (TATOLI) – Governu liuhusi Serbisu Munisipál Protesaun Sívil no Dezastre Naturál (PSDN) Baucau ajuda materiál konstrusaun ba vítima dezastre naturál uma-kain hamutuk 21.
Diretór serbisu munisipál protesaun sívil no dezastre naturál Baucau, Nelson Nunes, esplika, ajudu refere hanesan parte rekoperasaun ba vítima sira – kompostu materiál konstrusaun no osan mão-de-obra.
“Programa ajudu ne’e hosi nasionál, hosi munisípiu submete de’it dadus no hein halo distribusaun,” Autoridade másima, serbisu munisipál protesaun sívil no dezastre naturál, informa ba Agência TATOLI iha Vila nova, kuarta ne’e.
Materiál ne’ebé apoia ba vítima sira tuir klasifikasaun hanesan kalen, pregu, martelu, besi beton, besi kotak, kanuru, balde no arrame inklui orsamentu mão-de-obra. Verba ne’e kategória tuir danu ka estragu, hanesan aat maka’as $1.000, natoon $ 750 no kamaan $500.
Apoia refere distribui ba vítima sira iha postu admistrativu Quelicai hamutuk vítima uma-kain hitu, Venilale na’in-ida, Baucau vila sia, Baguia ida no Laga na’in-tolu.
“Ita sei apoia fazeadamente, ida-ne’e faze dahuluk no sei kontinua apoia iha tinan oin bazeia ba orsamentu no programa hosi nasionál,” Nelson Nunes akresenta.
Entertantu, Protesaun sívil no dezastre naturál Baucau rejista kazu akontesementu dezastre naturál durante tinan-2022 hamutuk 209 kompostu postu administrativu Baucau vila hamutuk 81 hanesan anin sobu uma 71, inséndiu ualu no rai halai rua.
Postu Quelicai hamutuk kazu 34 kompostu anin sobu uma 26, insédiu neen no rai halai rua, postu Venilale hamutuk 20 kompostu anin sobu uma 17, inséndiu ida no rai halai rua.
Postu Vemase hamutuk neen anin sobu uma tolu no insémdiu tolu, postu Baguia 25 kompostu anin sobu uma 23, inséndiu rua no postu Laga hamutuk 33 kompostu anin sobu uma 32 no inséndiu ida.
Notísia relevante:Ema ida lakon iha Tekinomata Baucau
Jornalista : Natalino Belo
Editór : Rafael Ximenes de A. B.
