DILI, 29 dezembru (TATOLI)—Ministériu Turizmu Komérsiu no Indústria (MTKI) liuhosi Komisaun Organizadora Feira Nasionál Promosaun Produtu Lokal, kinta ne’e, realiza kompetisaun ai-han lokál, ne’ebé partidipa hosi grupu 16.
Diretór Jerál MTKI, Jelino Soares, hateten, objetivu hosi atividade ne’e atu promove produtu lokál no motiva sosiedade liuhosi valoriza ai-han lokál sira.
“Ohin ita halo kompetisaun gastronimia ne’e atu promove produtu lokál no motiva sosiedade liuliu chef timor-oan sira atu hasa’e liután sira-nia kompeténsia no skill hodi motiva sira valoriza ita-nia ai-han lokál sira,” Diretór hateten iha Portu Dili.
Notísia relevante: MTKI loke bazar baratu hodi selebra Natál no tinan foun
Nia dehan, MTKI tenta atu grupu hosi munisípiu hotu partisipa iha kompetisaun maibé munisípiu neen de’it mak disponível hanesan Ermera, Viqueque, Dili, Baucau, Manatuto no Liquiçá.
“Orsamentu ba kompetisaun hamutuk $15.000, ida-ne’e ita sei haree ba ekipa juri, valór ba manán-na’in inklui ita mak prepara fundu ba kompetitór sira ba kompra ai-han lokál sira tein hodi mai partisipa kompetisaun ne’e tanba sira prepara ai-han tuir reseita ne’ebé komisaun organizadora prepara,” nia akresenta.
Hosi kompetisaun ai-han lokál ne’e, ba manán-na’in dahuluk sei hetan osan ho valór $1.500, manán-na’in daruak $1.000, no manán-na’in datoluk $500.
Iha fatin hanesan, kompetitór hosi restaurante Difranole munisípiu Manatuto, Diana Josefina, hateten, produtu ne’ebé prepara tuir kompetisaun ne’e bazeia ba pedidu hosi komisaun organizadora.
“Produtu lokál ne’ebé ha’u halo hodi aprezenta iha kompetisaun ne’e mak hanesan tukir manu Timor, balisaun, ikan saboko, fahi lalar no seluk tan,” nia dehan.
Jornalista : Arminda Fonseca
Editora : Julia Chatarina
