iklan

EKONOMIA, HEADLINE

MTKI loke bazar baratu hodi selebra Natál no tinan foun

MTKI loke bazar baratu hodi selebra Natál no tinan foun

Ministériu Turismu Komérsiu no Indústria (MTCI-Sigla Portugés) hamutuk ho setór provadu sira realiza programa bazar-baratu, iha resintu Sentru Konvensaun Dili (CCD, Sigla Portugés), tersa (13/12). Imajen Tatoli/Francisco Sony

DILI, 13 dezembru 2022 (TATOLI)- Ministériu Turizmu, Komérsiu no Indústria (MTKI) hamutuk ho setór privadu sira realiza programa Bazar-Baratu hodi selebra loron boot natal no tinan foun.

Diretór Jerál Komérsiu iha MTKI, Cosme Fátima Baptista da Silva, hateten, Bazar-Baratu ne’e planu MTKI nian loke ba públiku atu komunidade bele sosa produtu sira ho folin baratu.

“Bazar baratu refere ita halo ona lansamentu horiseik, ita konvida maluk negosiante sira ba faan produtu lokál, nesesidade bázika ne’ebé ho pressu baratu, nune’e komunidade bele aproveita sosa hodi festeza natál no tinan foun nian ho ksolok no dame”, Cosme Fátima Baptista da Silva, hateten, ba Agência Tatoli, via telefónika, tersa ne’e.

Bazar-Baratu ne’e loke tanba Governu ho setór privadu sira iha responsabilidade sosiál ba komunidade, tanba iha komunidade balun laiha kbi’it atu sosa sasan sira ne’ebé ho folin karun.

Enkuantu, Negosiante hosi Loja do Povo, Marciano de Sousa, hateten, sira-nia parte kontente tebes hetan konvite partisipa iha bazar baratu ne’e, tanba sasan ne’ebé sira faan mesak produtu lokál ho folin baratu.

“Ami kontente tanba bele hetan oportunidade partisipa bazar baratu ne’e, produtu ne’ebé ami faan folin mesak baratu, prodtu ne’ebé ami faan nia folin hahú hosi $0,50 to’o $14,00,” nia dehan.

Produtu lokál ne’ebé faan iha bazar baratu ne’e mak hanesan, foos-rai, koto, naan-maran, mina nú tein no virjen, fore-mungu no seluk.

“Desde horiseik to’o mai ohin rendimentu ne’ebé ami hetan seidauk to’o $100,00, tanba menus vizitante, bazaer ne’e loke iha fim de semana karik di’ak, maibé loke oras servisu nian entaun ema ladún mai sosa”, katak.

Nu’udar negosiante nia parte agradese ba Governu nia programa sira hanesan loke bazar baratu ne’e tanba sira bele lori produtu ba faan. Entretantu Bazar-Baratu ne’e loke ba públiku hahú loron 12 to’o 14 dezembru 2022.

Jornalista : Arminda Fonseca

Editór      : Florencio Miranda Ximenes

iklan
iklan

Leave a Reply

iklan
error: Content is protected !!