BAUCAU, 30 dezembru 2022 (TATOLI) – Sentru Formasaun Sentru Dezenvolvementu Komunitária (CDC, sigla Portugés) hahú rejista kandidatu formandu périodu tinan-2023.
Diretór Sentru Formasaun CDC Munisípiu Baucau, Vicente Matos Belo, esplika, fulan inskrisaun hahú iha novembru to’o dezembru no tuir planu sei hahú abertura no prosesu aprenijazen iha inisiu fulan-janeiru tinan-2023.
“Ita hakarak fó oportunidade ba joven hotu maibé tanba sala-aula sei iha faze konstrusaun no formadór sufisiente entaun ita limita tuir kondisaun ,” Diretór CDC Baucau informa ba Agência TATOLI iha Triloka, sesta ne’e.
CDC Baucau tuir planu sei simu kandidatu formandu hamutuk na’in-375 iha área rua hanesan formasaun lian Korea ho totál kandidatu hamutuk na’in-300 no área agrikultura jerál sertifikadu dahuluk hamutuk 50 inklui sertifikadu daruak ba hortikultura hamutuk nain-25.
Kritériu ba kandidatu joven feto no mane, tenki prense rekezitu hanesan diploma, foto no identidade pesoál sertidaun, billete identidade no kartaun eleitorál, osan rejistu agrikultura $3 inklui lian Korea $5.
Jerente CDC Vicente Belo, konsidera, liuhosi formasaun iha área rua refere bele ajuda joven Timor-Leste atu aprende hodi eleva koñesementu nune’e iha futuru no partisipa ba prosesu dezenvolvimentu nasaun liuliu loke kampu traballu iha área agrikultura.
Alende ne’e, prepara aan hodi aumenta abilidade hanesan lian Korea nune’e prontu bainhira iha oportunidade atu sai traballadór iha nasaun Korea.
“Joven iha oportunidade atu aprende, hadook aan hosi violénsia nune’e bele hadi’a ekonomia uma-laran,” Vicente Belo hato’o mensajen.
Entertantu, CDC Baucau iha tinan-2022 atribui sertifikadu ba formandu hamutuk 270 hosi munisípiu sanolu kompostu lian Korea no Agrikultura ho totál formadór nain-12 kompostu lian Korea na’in-ida no agrikultura nain-11.
Jornalista : Natalino Belo
Editór : Rafael Ximenes de A. B.
