Empreza Cipriano Felix investe iha plantasaun talas no fehuk ektare 7,5
DILI, 03 janeiru 2023 (TATOLI)—Diretór empreza Cipriano Felix Unipessoal, Lda, Arsénio da Costa Cabral Pinto, hateten, sira-nia parte dezenvolve ona plantasaun talas no fehuk iha rai ektare 7,5, iha postu administrativu Lospalos, munisípiu Lautém.
“Inisiativa ne’e ho objetivu atu reforsa produsaun lokál hodi responde ba nesesidade merkadu no kontribui ba agrikultura no pekuária iha Timor-Leste. Ita investe iha agrikultura, ba área kuda talas no fehuk tanba Governu nia programa Cesta Bázika ne’e inklui hotu produtu rua, ho ida-ne’e ita konsidera importante hodi kuda,” Diretór empreza informa ba Agência Tatoli, via telefónika, tersa ne’e.
Notísia relevante: Governu atribui deklarasaun benefísiu rua ho kapitál investimentu millaun $4
Aleinde ne’e, empreza lokál ne’e prepara ona rai ektare 20 atu kuda produtu seluk hanesan batar, nuu no produtu seluk.
“Ami-nia empreza ne’e investe mós iha área pekuária, agora ami iha fahi makau hamutuk 47 no karau vaka 48. Ami iha planu iha tempu badak sei hakiak tan manu rade. Kona-ba hahán ba fahi, empreza halo produsaun mina-nuu, entaun hosu produsaun ne’e, nuu tein bele fó han fahi,” nia akresenta.
Empreza ne’e iha ona traballadór permanente hitu no kontratadu 14 inklui traballadór sazonál 10.
Antes ne’e, Ajénsia Promosaun no Exportasaun, TradeInvest, atribui sertifikadu investidór no deklarasaun ba empreza sira inklui mós empreza Cipriano Felix, iha loron 22 dezembru 2022.
Jornalista : Arminda Fonseca
Editora : Julia Chatarina
