DILI, 04 janeiru 2023 (TATOLI) – Sekretáriu Jerál Federasaun Karate-do Timor – Leste (FKTL), Antonio Carlos de Araujo, rekorda 2022 la konsege realiza kampionatu nasionál hodi hasae atleta sira nia prestasaun tanba federasaun laiha orsamentu tanba Governu la apoiu.
“Tinan 2022 ami iha planu barak maibé so kampionatu nasionál ne’e hanesan eventu bo´ot maibé ami la konsege realiza tanba federasaun laiha orsamentu, ami hato´o proposta ba Sekretáriu Estadu Juventude no Desportu (SEJD) maibé sira dehan ami nia proposta tarde ne’ebé osan laiha ona”, dehan Antonio ba Agência TATOLI, iha Jinaziu, Dili, kuarta ne’e.
Nia rekorda iha tinan sira ba kotuk kampionatu nasionál FKTL nian sempre hetan apoiu orsamentu hosi SEJD maibé iha 2022 orsamentu laiha.
“Tinan sira ba kotuk ne’e ami halo kampionatu nasionál, Governu mak apoiu orsamentu, maibé tinan kotuk sira dehan osan laiha no ami nia proposta tarde ami labele halo buat ida tanba Governu mak iha liu kompeténsia”, nia relata.
Maske kampionatu nasionál laiha maibé organizasaun tolu ne’ebé hamahan aan iha FKTL hanesan Goju Ryu, Kusin Ryu no Shotokan realiza rasik kampionatu nasionál hodi buka fini ba atleta sira no ezame sintu ba membru sira iha setembru no novembru liu-ba.
Aleinde ne’e, FKTL konsege tau osan rasik hodi ba partisipa iha eventu internasionál Karate1 dserie A iha Jakarta Indonézia no iha eventu ne’e nasaun besik 80 iha kontinente haat mak partisipa.
Eventu internasionál atleta na’in lima mak ba partisipa kompostu feto tolu no mane na’in rua. Iha jogu ne’e, Timor – Leste la konsege hetan medalla balu maibé ranking karate Timor–Leste nian aumenta iha lista Karate-do Internasionál.
Tuir dadus totál atleta Karate-do iha Timor–Leste hamutuk rihun rua no iha Munisípiu hamutuk na’in 500-resin ho nune’e totál membru iha teritóriu nasionál purvolta 2.500.
Jornalista:Hortencio Sanchez
Editór : Zezito Silva
