DILI, 04 janeiru 2023 (TATOLI) – Prezidente Konfederasaun Desportiva Timor–Leste (CDTL-sigla Portugés), Macario Sanches, hateten Governu liuhosi Sekretariu Estadu Juventude no Desportu (SEJD) transfere ona orsamentu hamutuk rihun $82 ba konta CDTL nian no atu apoiu ba modalidade hirak ne’ebé atu ba partisipa iha eventu rejionál SEA Games Kamboja iha fulan maiu tinan ne’e.
“Governu transfere ona osan hamutuk rihun $82 mai konta CDTL nian, osan sira ne’e atu halo preparasaun ba atleta sira antes dezloka ba tuir kompetisaun ne´ebé sei akontese iha fulan maiu”, dehan Prezidente iha edifísiu CDTL Jináziu, Dili, kuarta ne’e.
Prezidente CDTL ne’e esplika orsamentu ne’ebé Governu aloka atu utiliza ba atleta sira nia alojamentu, ekipamentu, preparativu ba atleta sira nian iha faze formasaun no seluk tan.
Iha eventu ne’e Governu no CDTL deside ona modalidade hamutuk ualu mak sei ba partisipa, mak Futeból, Boxe, Atletizmu, Karate-do, Taekwondo, Siklizmu, Xadres no Voleiból Praia.
“Konfederasaun Desportiva Timor – Leste (SEDTL) reune ona ho Sekretariu Estadu Juventude no Desportu (SEJD) iha tinan kotuk aprezenta ona modalidade poténsia hamutuk ualu mak atu ba partisipa iha eventu rejionál ne’e”, nia relata.
Nia dehan, planu ne’ebé CDTL no Komite Olimpiku Nasionál (CONTL-sigla Portugés) sei realiza lansamentu ofisiál iha semana oin iha faze primeiru konsentrasaun preparasaun atleta ne’ebé delega ba modalidade sira hotu no iha fulan marsu no abril atleta hotu halo traning camp iha de’it Dili laran antes ba kompetisaun.
Hosi modalidade ualu ne’e, modalidade hitu atleta hamutuk na’in 26, ofisial ne’ebé akompaña atleta sira hamutuk na’in 13, enkuantu futeból atleta hamutuk na’in 20 no ofisiál na’in lima ho nune’e totál atleta no ofisiál hamutuk ema na’in 64.
Jornalista:Hortencio Sanchez
Editór : Zezito Silva
