Top

FKTL sei partisipa eventu internasionál hamutuk 27

Sekretariu Jerál KFTL, António Carlos de Araújo. Imajen/Espesiál

DILI, 04 janeiru 2023 (TATOLI) – Sekretáriu Jerál Federasaun Karate-do Timor–Leste (FKTL), António Carlos de Araujo, dehan tuir kalendáriu internasionál ne’ebé publika ona katak 2023 Karate-do sei partisipa eventu internasionál hamutuk 27.

“Planu anuál ami nian hanesan kada tinan sempre hala´o, tinan ida ne’e iha diferente oituan tanba ami iha ona kalendáriu mundiál, eventu hamutuk 27 mak ami sei ba partisipa”, dehan Sekretáriu Jerál ne’e ba Agência TATOLI, iha Jinaziu, kuarta ne’e.

Atividade ne’ebé FKTL sei ba partisipa mak hanesan, Series A Karate-do iha Gresia, Primer Ligue Karate-do iha Egiptu, Karate juniór under 21 Championships iha Egiptu, Youth Ligue iha United Arab Emirate (UAE), Serie A iha Turky, EKF seniór Championship, Primer Ligue iha Costa Rica, Youth Ligue iha Espana, Serie A iha Canada, PKF seniór Championships iha Costa Rica, Primer Ligue iha Japaun, Europeans Games Karate competition iha Polandia.

Enkuantu, Youth Championships iha Croasia, Youth Ligue iha Croasia, AKF Championships iha Costa Rica, World Beach Games Karate iha Bali Indonezia, PKF Cadet, juniór U-21 Championship iha México, UFAK Championships iha iha África Súl, África Games Karate iha Ghana, Primer Ligue iha Costa Rica, Youth Ligue iha México, World Combat Games iha Arab Saudi, Pan American Games iha Chile, World seniór Champion iha Ungaria, Serie A iha Costa Rica, Youth Ligue iha Italia no Primer Ligue iha Malazia.

Nia dehan atleta atu ba partisipa iha eventu hirak ne’e preparadu ona dezde tinan hira ba kotuk no antes atu ba kompete FKTL sei haruka proposta ba Governu liuliu Sekretáriu Estadu Juventude no Desportu (SEJD) atu apoia orsamentu.

“Atividade sira ne’e ita tenke ba partisipa balu, ita sei la ba hotu laiha buat ida maibé balu ita tenke ba maibé ami sei halo proposta ba Governu hodi husu apoiu liuliu orsamentu nune’e ami bele ba partisipa, kona-ba atleta ami preparadu”, hateten.

Aleinde kalendáriu internasionál, FKTL mós iha ona planu atu realiza kampionatu nasionál iha tinan ne´e ho objetivu atu hasae atleta sira nia prestasaun nune’e bele ba partisipa iha eventu internasionál sira ho di’ak.

Kampionatu nasionál ne’ebé sei halao iha tinan ne’e, hamutuk rua mak hanesan Xanana Cup no SEJD Cup.

“Ami mós iha kreatividade ida atu halo sirkuit out trai out kada atleta sira hosi klase ba klase atu buka se mak prestasaun di’ak atu prepara ba eventu internasionál sira”, revela.

Nune’e, FKTL mós sei halo ezame ba membru sira hodi sae sintu kada tinan ida dala rua iha fulan neen dala ida.

“Planu sira mak ne’e hotu ona, ami mós sei halo ami nia rejimentu interná iha tinan ne’e nia laran tanba durante ne’e ami seidauk iha rejimentu federasaun nian”, konklui.

Jornalista:Hortencio Sanchez

Editór : Zezito Silva

Publisidade

Leave a Reply

Latest Post

error: Content is protected !!