DILI, 05 janeiru 2023 (TATOLI)–Xefe suku Colmera, postu administrativu Vera Cruz, munisípiu Dili, Armenio A. da Silva, hateten suku Colmera rejista reklamante subsídiu $200 hamutuk 70 inklui benefisiáriu ho nia rendimentu mensál $500 ba leten.
Notísia Relevante: Pagamentu subsídiu $200 hela Dili-RAEOA mak seidauk finaliza
“Ami iha lista reklamasaun hamutuk 70 maibé ida-ne’e inklui ho em sira-ne’ebé ho nia saláriu mensál $500-resin no balun la mai fatin pagamentu, entaun ami devolve ona osan $14.200 ba kofre Estadu,” Armenio A. da Silva hateten ba Agência Tatoli, iha edifísiu Polísia Nasionál Timor-Leste (PNTL), Caicoli, Dili.
Líder komunitária ne’e haktuir, ida-ne’e sira sei hetan direitu subsídiu fim do ano $200 ba uma kain ne’e, tanba tuir argumentu Prezidente Repúblika katak sidadaun ne’ebé seidauk hetan no reklamante sira iha direitu atu simu subsídiu refere.
“Obrigatoriamente ita tenke fó ema-nia direitu maibé ida-ne’e hein de’it hosi na’in-ulun sira tanba osan ne’ebé atu selu ba sidadaun ne’ebé seidauk simu ne’e ami entrega fali ona ba banku,” nia dehan.
Totál família ne’ebé simu hamutuk 506 no 436 mak simu ho totál orsamentu alokadu rihun $87-resin.
Iha Dekretu- Lei númeru 37/2022, kona-ba subsídiu “Fim do Ano ” ho montante $200 ba ema vulnerável ka uma kain ne’ebé ho rendimentu ki’ik-liu $500 kada fulan.
Notísia Relevante: Eis PR Lú Olo-Prezidente PN deside la simu subsídiu $200
Jornalista : Osoria Marques
Editór : Cancio Ximenes
