NITAG garante vasina PCV seguru
DÍLI, 07 janeiru 2023 (TATOLI) – Grupu Tékniku Nasionál Imunizasaun Timor-Leste (NITAG-TL) garante vasina PCV seguru ba labarik tinan-lima mai kraik hodi prevene ba moras pneumonia iha Timor Leste.
“Ami garante vasina sira ne’ebé implementa iha Timor-Leste seguru, hanesan moós agora daudaun vasina PCV ne’ebé ita atu halo kampaña iha loron 12 janeiru tanba molok atu introdúz bazeia ba peskiza katak dadus sira ne’e hatudu evidénsia di´ak”, Prezidnete NITAG iha Timor Leste, Mariano da silva Marques, dehan iha Hotel Timor.
Nia dehan evidensia ne’e, NITAG konsulta ho nasaun sira seluk maibé hatudu katak iha impaktu ne’ebé mak di´ak.
“Ami rekomenda katak ida ne’e garante ba saúde públika timor-nian ho objetivu atu salva sidadaun timor hotu, tanba ne’e iha loron 12 fulan janeiru sei halo kampaña ba PCV, pólio, sarampu no albendazole hodi bele hasae imunidade ne’ebé di´ak ba labarik iha nasaun Timor -Leste”, dehan.
Molok atu halo introdusaun ba vasina PCV, NITAG halo estudu barak ona tanba Timor-Leste iha risku aas ba moras pneumonia ida ne’e.
“Tuir dadus ne’ebé iha katak ita Timor-Leste iha kazu barak ba moras pneumonia ne’e rasik tanba ne’e mak presiza introdúz vasina ida ne’e ba labarik sira”, refere.
Iha fatin hanesan, Ministra Saúde, Odete Maria Freitas Belo, dehan durante ne’e NITAG halo servisu lubuk ida kona-ba vasina nian.
“Saida mak sira halo mak atividade vasinasaun ne’ebé ita nomea sira iha situasaun Covid-19 mak atu introdúz vasina sira liuliu Covid-19 nian, entaun sira nia ezisténsia ne’ebé boot tebes ba ita mak fó dalan ba ami MS atu uza vasina sira ne’e ba ita nia populasaun sira hanesan vasina astrazeneca, Pfizer, no senovac”, hateten.
Governante ne’e esplika daudaun ne’e MS atu halo tan kampaña ba vasina foun ne’ebé mak atu mai iha fulan ne’e nia laran ba labarik sira ho moras pneumonia, Polio sarampu no lumbringa.
Jornalista : Felicidade Ximenes
Editór : Zezito Silva
