Top

Boxista nain-haat prepara kompete iha SEA Games Kamboja

Boksista sira hala’o hela treinamentu iha fatin-treinamentu, Benfica. Imajen/Tatoli

DILI, 09 janeiru 2023 (TATOLI) – Boxista nain-haat, Délio A. Mouzinho hosi El-Matador, Elídio da Conceição hosi El-Matador, Raimundo Galhos hosi Oriental Boxing no Dovi Ramos hosi Benfica, prepara ona atu joga iha SEA Games 2023.

“Ami nia preparasaun di’ak hela, Federasaun Boxe Amadora Timor-Leste (FBATL) fó hela orientasaun mak fó treinu hela ba atleta sira, sira agora treinamentu másimu los, prontu atu ba kompete”, dehan formadór prinsipál ba atleta selesaun nasionál Boxe Timor-Leste, Victor Ramos ba Agência TATOLI, iha Benfica, segunda ne’e.

Nia subliña totál atleta ne´ebé preparadu atu ba tuir kompetisaun hamutuk nain-haat, tuir rekomendasaun hosi Komite Olímpiku Nasionál Timor-Leste (CONTL-Sigla Portugés), Konfederasaun Desportiva Timor-Leste (CDTL-sigla Portugés) no Sekretariu Estadu Juventude no Desportu (SEJD).

Ramos garante atleta hirak ne´e sei hatudu prestasaun di´ak iha eventu rejionál hanesan mós iha tinan kotuk ne´ebé atleta Délio Mouzinho oferese medalla perak ida ba Timor-Leste.

Iha fatin hanesan, atleta Delio Mouzinho ne’ebé antes ne’e sai hanesan atleta prestasaun di’ak iha SEA Games Vietname nafatin hetan konfiansa hodi reprezenta Timor-Leste ba SEA Games Kamboja. Atleta hirak ne´e foin halo treinamentu semana ida-resin maibé sei hatudu prestasaun di’ak liu iha eventu ne’e.

“Ami foin halo preparasaun semana ida-resin maibé hanesan atleta ami sempre treinu tanba atu ba kompete hasoru nasaun seluk tenke halo preparasaun ida ne’ebé másimu”, revela.

Atleta foinsa´e  ne’e rekorda iha tinan kotuk hetan ona segundu lugar hakarak ka lakoi iha tinan ne’e nia tenke hetan primeiru lugar.

Jornalista: Hortencio Sanchez

Editór : Zezito Silva

Publisidade

Leave a Reply

Latest Post

error: Content is protected !!