DILI, 09 janeiru 2023 (TATOLI) – Federasaun Boxe Amadora Timor-Leste (FBATL) sei realiza kongresu ordináriu hodi hili estrutura foun. Kongresu ne´e sei akontese iha 13 janeiru tuir desizasaun hosi asembleia jerál.
“liuhosi enkontru ne’ebé ami hala´o ohin deside ona data ba kongresu nian mak iha 13 janeiru agora. Ho nune’e ami mós sei distribui konvite ba asosiasaun no klube sira, nune’e bele partisipa iha kongresu ne’e”, dehan Prezidente Interinu FBATL, Domingos Malitete, iha Benfica, segunda ne’e.
Nia dehan assosiasaun Boxe hamutuk 10 no klube hamutuk 23 mak sei partisipa kongresu. Hirak ne´e mak iha direitu hanesan kongresista hodi hili estrutura foun atu lidera FBATL ba tinan haat.
“Loloos ita normaliza ona ita nia assosiasaun sira sira mak bele partisipa mesak iha kongresu, klube labele partisipa maibé ita sei tolera tanba iha Dili seidauk forma asosiasaun no munisípiu balun mós asosiasaun seidauk forma mak ita tolera klube sira partisipa maibé bainhira estrutura foun aban bairua sae karik tenke normaliza asosiasaun sira hotu atu kongresu tuir fali mai asosiasaun sira mak iha direitu liu partisipa iha kongresu”, revela.
Asosiasaun 10 ne’ebé agora eziste ne’e mak hanesan, Lautem, Viqueque, Baucau, Manatuto, Aileu, Manufahi, Ainaro, Ermera, Bobonaro no Oe-Cusse.
Kongresu ne’e sei hala´o iha Dili ho orsamentu hosi Komite Olímpiku Nasionál Timor-Leste (CONTL-sigla Portugés) ho montante $2,500 no kongersu sei hala´o durante loron ida.
Iha kongresu ne’e sei halao diskusaun ba rejimentu interna federasaun nian no sei aprova hafoin tama eleisaun hodi hili Prezidente foun ho estrutura sira ba mantadu períodu 2023-2026.
Jornalista:Hortencio Sanchez
Editór : Zezito Silva
