DILI,09 janeiru 2023 (TATOLI) – Diretora Alta Kompetisaun Sekretariu Estadu Juventude no Desportu (SEJD), Maria Luisa Monteiro, hateten SEJD aprosima nafatin ho Federasaun Futeból Timor-Leste (FFTL) no Liga Futeból Timor-Leste hodi bele realiza liga époka 2022-2023.
“Kona-ba liga nian SEJD transfere ona osan ho montante rihun $200 ba konta FFTL nian, entaun ami tenta nafatin koalia ho parte rua atu hare óinsa liga ne’e bele kontinua lao iha tinan ida ne’e”, revela Maria ba Agência TATOLI, iha edifísiu SEJD.
Nia esplika orsamentu ne’ebé transfere ona ba konta FFTL nian parte rua halo ona kontratu pluri anual ho orsamentu 2022 nian sei bele kontinua ezekuta iha 2023.
“Governu fiar katak iha tinan ida ne’e parte rua FFTL-LFTL sei realiza liga iha époka ne’e, maibé jogu mak sira la realiza iha tinan ne’e, Governu sei kria enkontru ida hodi foti medida seluk maibé ida ne’e depois mak ita haree”, adianta.
Iha fatin ketak Diretór Relasaun Públiku LFTL, Diego Neto, hateten tinan mak ba ona 2023 maibé jogu sei bele halao no muda de’it mak kalendáriu maibé epoka nafatin.
“Ne’ebé husu ba klube sira hotu atu hakbesik aan mai liga hodi priénse rekezitu sira, atu nune’e bele partisipa iha jogu époka 2022-2023, semana kotuk ami halo ona reuniaun entre diresaun kona-ba lalaok kompetisaun époka ne’ebé atu halao ne’e”, dehan Neto.
Tanba ne’e, iha tempu besik LFTL sei bolu dirijente klube hotu atu halo diskusaun hodi hatene los preokupasaun klube sira nian tanba saída mak la hakbesik aan ba LFTL hodi rejista, nune’e bele partisipa iha jogu.
“Ami kontatu ona klube sira internalmente maibé sira hakarak atu mai rejistu hodi partisipa iha liga, maibé tenke hatene mós kona-ba finansiamentu ne´ebé apoiu hosi FFTL”, nia relata.
Nia relemebra bazeia ba reuniaun iha tinan kotuk entre FFTL no LFTL informa ona katak orsamentu hamutuk rihun $200, SEJD transfere ona ba konta FFTL nian maibé to´o agora FFTL rasik seidauk halo transferénsia ba konta LFTL nian hodi bele realiza jogu.
“Loloos ne’e FFTL tenke manda ona 40%, tanba ami presiza halo servisu administrasaun nian, ida ne’e laiha, ami atu print de’it surat tahan mós osan laiha atu hola, LFTL ne’e depende ba orsamentu Estadu nian, ida ne’e mak ami nia preokupasaun”, nia afirma.
Ho nune’e, LFTL rasik seidauk simu informasaun ruma kona-ba orsamentu ne’ebé FFTL seidauk halo transferénsia ba konta liga nian.
“Maibé iha semana oin hanesan ne’e ami sei tur hamutuk fali ho FFTL atu hare ba asuntu ne’e, atu nune’e koalia mós kona-ba finansiamentu suporta ne’ebé FFTL atu fó ba klube sira”, adianta.
Nia garante bainhira buat hotu FFTL no LFTL rezolve ona mak liga sei hala´o iha fulan fevreiru nia-laran.
Ho asuntu ne’e, TATOLI tenta konfirma ba FFTL maibé responsável federasaun ne’e okupadu ho servisu esensiál balun.
Molok ne’e, Liga Futebol Timor-Leste (LFTL), hahú iha loron (21/02) too (21/03) loke ona janela transferénsia ba klube 19 ne’ebé hamahan an iha LFTL hodi halo rejistu ba jogador, nune’e bele partisipa iha liga époka ne’e tuir kritériu no oráriu Asian Football Confederation (AFC) nian loke ona iha 10 fevereiru too 10 marsu.
Tanba ne’e, LFTL husu ba klube hotu atu hakbesik an ba edifísiu LFTL hodi rejista naran jogadór sira, nune’e bele kompete iha liga 2022 nian.
lha époka ne’e kompetisaun sei la’o nakonu iha tinan ida nia-laran, tuir kalendáriu tentativu ne’ebé iha ona sei hahú 21 abril no ramata iha 12 novembru tinan ne’e.
Entretantu, jogu ba primeira divizaun ba primeira volta no segunda volta sei halao iha Estádiu Munisipál Dili no Estádiu Gleno ho totál jogu 90 ba klube 10 ne ebé tuur hela iha primeira divizaun. Enkuantu ba segunda divizaun klube sia (9) sei joga de it iha Estádiu Munisipál Dili hamutuk jogu 36.
Aleinde ne’e iha jogu tasa 12 Novembru sei joga hosi klube 19 no nafatin hosi sistema vota fora ou lakon sai hamutuk jogu 18.
Klube 19 ne’e mak hanesan primeira divizaun AD SLB Laulara. AS Ponta Leste, Karketu Dili FC, Assalam FC Emanuel FC Atana FC Lalenok United FC Atletico Ultramar Academica FC no Porto Taibessi FC.
Enkuantu Segunda Divizaun mak hanesan. Kablaki FC Nagardjo FC DIT FC, Lica-Lica FC, Lemorai FC, AS Marca, FIELFC Zebra FC no Boavista FC Timor.
Jornalista:Hortencio Sanchez
Editór : Zezito SIlva
